Kant in moune, la tète i blok, kant in mové lidé i ranplas tout lo mazinasion. Épi kant in n’ot moun, san k’li vé, san k’li atann, san k’li pé mazine lo moun la dor dann son do dépi tan-é-tan d’zané la déside rèy son nom an parmi la list bann moun an vi.

Kan tout z’afèr i ariv lo promié moun, tout l’idé i pass dann son tèt, tout parol li antann, i vien pa bou tié so bébète l’apré manz ali par anndan. É kan l’ot la pa moiyin fé lo pli pti parad pou éskiv son déstin.
Alors sak i doi spassé i éspas. Dann zournal demoun bien (!) i lir sak in zournalist la ékri akoz i fo bien gingn son soso, akoz lo léktèr i èm-paré t’il ? La "fès avèk lo san", akoz ossi sa i kass in pé la monotoni, sirtou akoz sa i fé vann papié.

Mé kissa va di boug-la lé bien malad, kèl médsin va trouv maladi-la avan èl i fé son déga, konbien larzan va mète pou soign sa. Oussa i lé lo plan ? La poin ! Arienk in bouro, épi son viktime, inn an fas dé l’ote. In bouro k’i pé solman éte in bouro, in viktime k’i pé solman ète in viktime.

Justin