Oté

Zis inn-dé pti mo pou rapèl in éskandal pa ordinèr

Justin / 31 out 2018

JPEG - 43.6 ko

Plito torti ké d’moun :
Kan bann zamérikin té i vé fé in gran baz militèr dann l’oséan indien dann bann z’ané sosisant-soisann dis, bann zanglé la propoz azot Diégo Garcia dann Chagos épi Aldabra dann Sésèl mé bann z’amérikin la pa vouli fé z’ot baz dann Aldabra pars laba néna torti é sa sé in zanimo i doizète protézé. Donk zot la shoizi Diégo Garcia pars laba l’avé arienk demoun é demoun sa i pé zète sinploman éspilsé é sé sak zot la fé avèk troi mil pèrsone.

Tousa pou in bon pri dsi bann fizé polaris :
Kan bann zanglé l’avé bézoin ashté fizé polaris pou mète dann sou marin é konm apré la guèr zot lété in pé o flan, zot la aksèp fé lo vid dann bannzil chagos konmsa laba l’avé poin in grinn moun é sa sé bann zamérikin la poz kondisyon-la. Poitan konm moin la di la-ba l’avé troi mil pèrsone, avèk z’ot lékonomi, avèk z’ot kiltir, z’ot lang é tout sak i fé in pèp. Mé bann zamrikin l’avé di i fo fé lo vid é zot la fé lo vid.

Lo chien bann chagossien dann kalorifèr :
Bann demoun chagos l’avé z’ot chien konm demoun partou, mé konm lo shien i pé z’ète lo sign lo bann zil té péplé, la mète lo shien dann kalorifèr épi la brilé. Kalorifèr i sèrv pou bril bann déshé koko, so kou isi la ansèrv pou bril zanimo. In sort four krématoir si zot i vé !

Antansyon l’aviyon i sava bonbardé :
Pou fé alé bann chagosien pou vide lo bannzil, la komans par fèrm lo dispansèr. Donk tout malad té i doi alé Moris é pou rotourné l’avé pi d’bato. Aprésa la siprime lékol. Aprésa la siprime bann transpor marshandiz. An dèrnyé la di bann rékalsitran si zot i sava pa, antansyon l’aviyon i sava bonbardé. In bonpé la gingn la krintiv épi la rant dann bato pou alé Sésèl sansa Moris san léspoir rotourn shé zot.

La prizon konm lotèl sink étoil.
Kan in bann chagosien l’ariv Sésèl l’avé poin arien paré pou zot rès dodan, poin manzé pou zot, poinn linz, poinn travaye, promyé tan la mète azot dann in prizon Sésèl konmsi zot léé in bann gran kriminèl. In lotèl sink étoil in nouvo kalité ! Bann chagosien, sak laté transporté Moris la rotrouv azot dsi lo ké lo por, parèye san manzé, san travaye, san kaz pou zot résté.

In bann bèl tonm pou lo shien militèr :
Bann chagosien néna z’ot simetyèr mé zordi an dégréné. Bann chien miltèr pou z’ot par néna bann tonm éstra lé a oir avèk z’ot foto, z’ot plak marbr, z’ot nom épi shakinn son pti mozolé. Kan i ariv lo dé novanm mi pans bann chagosien z’ot kèr i singn pars zot i pé mèm pa rann in vizite z’ot vyé famiy désédé. Mi éspèr bann solda i rann in vizite z’ot chien.D’apré sak mi oi, shakinn isi ba néna son l’imanité.