Alé la boutik, kisoi dann ti komèrs, kisoi dann gran sirfas, agard létikète ! Ou i oi lo pri k’i vann, mé ou i oi pa lo pri l’ashté, loktroi d’mèr konbyin, la T.V.A. é lo bénéfis lo boug.

A ! mé tansyon ! Ou i pé konpar lo bann pri, si ou i vé, mé i fo ou lé for, plis ké for ! Sé konm k’i diré ou l’apré pas out gran sèrtifika konm dann tan lontan : konpar lo pri in paké kékshoz i di aou nana 470 gram dédan, avèk in n’ot paké lo mèm zafèr nana 360 gram so kou isi. La, ou lé moungué-la !
Ou lé pa kontan ? I ardonn aou lo pri in kilo la marshandiz. In kilo fromaz ? Oui mé kisa i ashèté in kilo fromaz. In kilo piman ? Ou lé bon pou gingn linflamasyon ! In kilo bonbon ? Oté ! Mi konsèy pa ou, si ou vé pa out dan i pouri.

Lo pri lésans ? Sa lé transparan sa ! Tèlman transparan k’in moun gabié, vik li lé Préfé, la mète dé moi plis in zour pou anons lo pri. Kèl anonsé ? Fé mète sa an misouk dann zournal épi dann télé.

Lo pri marshandiz ? Sa in n’afèr sa, sé kaziman konm banna i di dan la Frans : « la bouteille à encre ». Si ou na larzan pou ashté, ou i ashté, avèk dann out kèr zis l’inprésyon k’i pran aou pou in kouyon.

Justin