Sa i vé pa dir manz vant plin : an kontrèr ! Sa i vé dir ou la bèk-bèk in pé sorman. Akoz i di sa alor ? Sinploman pars lé posib manzé la pankor paré. Pétète la métrès mézon la di i fo atann. Pétète ankor lo grin i pran lo tan pou kuir é la vyann-si néna la vyann-té in pé dir. Dann in ka konmsa, i fo ou i anbète in pé la boush an atandan. Avèk kosa ? Dé grin pistash, osinonsa in pti amiz la gèl. Mon gran mèr téi anbète son boush avèk in bout ranpang épi dé grin dsik. Dé foi galman in pti loryo l’apré dor dann son posh dopi inndé zour é èl la pa trouv in marmaye pou don. Aprésa, an rot pou ramas la paye é rotour kaz dépar dsi l’kou d’troi-katrèr. Sirman lo tann lontan lété pa konm sète koméla. Mi less azot rofléshi la dsi, é ni artrouv pli d’van sipétadyé.