Mi ansouvyin, na in bon koup de tan, kan l’avé in mor par aksidan, la famiy téi mank pa d’mète in kroi déssi bor shomin, bordaj la mèr , déssi kap. Suivan landroi la pèrsone la pèrd la vi, la sort par koté d’issi pou alé koté d’tanto. Sa té konm in souvnir, in l’invitasyon pou pans in pé l’moun kan ou i pass par la. Pars la mor, sa i domann réspé.
Nout toute i koné ossi, la plipar d’moun, kan motèr i arète, i sava dann simetyèr. La plipar d’tan dann in pti tonb byin fré, byn anfléri,avèk in kroi byin pène zis avan la fète dé mor, moi d’novanm. La fète dé mor ? Oui sa in n’afèr nou la byin bézoin, sa in n’afèr ni mank pa, shak ané, toultan k’nout santé i pèrmète anou. Nout z’ansète lé la-ba foutor. Toulmoun na son z’ansète dann in simetyèr !
Toulmoun ? Non, lé maléré mé toulmoun, an parmi nout bann z’ansète la pa trouv in plas pou son dèrnyé ropo, dann in zoli simetyèr. Konbyin santène milyé zésklav la pa trouv in plas dann simetyèr ! Mèm si lo kode noir té i oblij antèr azot dann simetyèr si zot lété batizé banna la antèr azot konm zanimo. Konbyin d’moun, bann kriminèl la trète la palank dan la mèr, pars té mor, sansa pars bato té i fish déyèr bann négriyé kan la trète té fine défandi.
Lé ga, koméla, i antann souvan lo kozman« fé son dèy ». Moin na in dalon, i préfèr di « li akonpagn lo mor dann son dèrnyé voiyaz », mé kissa la akonpagn nout bann z’ansète zésklav dann z’ot dèrnyé voiyaz, épi tousa bann moun lé mor dann bato la trète, koman la akonpagn azot. Déssèrtin i pans so bann z’am-la la pankor trouv z’ot plas. Sé in bann z’am érante... Na dé foi, moin sré kontan, in zour dan l’ané, in zour pou banna, éspésyalman pou zot, pou pans azot in pé, pou dir azot ké ni souvyin d’zot. Nou la pa nyabou anpèshé, mé ni ansouvyin. Zis pou dir azot : nana in plass pou zot, tèr-la, dann nout kèr ! Sa sé nout patrimoine, sa… Si mi tronp pa.

Justin