Dann komansman mwin la panss demoune téi invante in pé pars sanm pou mwin moush néna in roprodikssyon ovipare :donk li ponde dozèf épizapré sète uit zour konmsa lo zèf i éklo pou donn pti vèr. Donk lé pa possib li ponde dann marmite é tré p d’tan apré néna pti vèr . Afors demoune téi di sa, mwin la fini par rande amwin konte par mwin mèm demoune i pé pa invante in n’afèr konmsa.

L’èr-la, in kamarade la di avèk mwin toute moush la pa ovipare, déssèrtènn lé vivipar donk zot i ponde dirèktoman bande pti vèr dann marmite.. Lo tan la passé , lo moush blé li mème la diminyé ;mi panss zordi li la fine disparète. Disparète an mèm tan é rézin maron.

Mé kèl rapor ?

Pars l’avé in bataye téi éspass an déor d’nout vi anou rényoné.An fète, bande sèrvis agrikol l’avé désside siprime rézin maron pars sa la pa in kékshoz de shé nou é pou détrui sa in pé la parti dann zil moluques-L’indonésie- pou alé rode bande déstriktèr rézin maron- lo tro famé moush blé. Konm l’afèr téi éspass an koulisse, nou rényoné d’baze nou té i koné pa in pé té apré zoué avèk lo fé.

Détrui rézin maron sé priv bande zélvèr moush a myèl d’in rékolt domyèl. Détrui rézin maron sé priv anou d’in frui nou téi manz dopi étan pti.. An fète lo rézin maron la fine bien diminyé zordi.

Mi rapèl in konvèrssassion avèk in lansien mèr sosyalist la Plène palmist.Kan mwin la di ali dan la zourné mwin la vi moush blë dann son komine, li la di amwin an prinsip sa i monte pa tro dsu la otèr.Mé li la di amwin-vré , pa vré, mi vande konm mwin l’ashté-i paré an o-lyeu déssèrtin téi vé ziska détrui gouyavyé pars sa la pa in plante indigène pou nou.

Rozman la koupe la manké gouyavyé la kontinyé lo parkour ni koné, mé pa réizin maron imolé dsu l’otèl bande konéssèr-an touléka sak i kroi zot i koné myé ké nou noute zintéré rényoné.

A bon ékoutèr, salu.