Moin la fine fé la romark in bon pé d’moun na famiy i travay dann batiman. Moin ossi, moin nana la famiy i travay déssi shantyé : li lé shèf d’ékip, mé i fé fèr ali in boulo shèf shantyé. Donkalor, la done ali koéfisyan 159, é d’apré sak li di amoin, li gingn son soso asé byin dann son métyé. Tan myé pou li, mi dout pa li mérite son larzan travay.

Mé dann finisyon moi d’novanm, li la gingn doulèr épi li té blizé pran in somenn konzé maladi. Moi d’zanvyé, li té an form é paré pou arpran son travay. Li la prézant biro. Zour-la, son patron la di ali : i konsidèr li travay, mé na poin shantyé. Donk i fo li atann son kaz ziska tan k’i di ali vyin.

Dimansh, lété lo vinn-dé févriyé. Li asiz son kaz dépi in moi déza. Tazantan, li sonn son patron, k’i di ali : i fo atann ankor in pé. Mé li la antann konm in son, nana dis pèrmanan i sort gingn z’ot lisansiman é li l’apré domandé kansa sar son tour.

Ziskakan va pèy ali pou li asir ? Li koné, li lé sir, li kroi son sityasyon va klèrsi san tardé. Mé kan ? Son patron i koné pa !
In lantropriz la sonn ali pou d’mandé si li vé pa travay koéfisyan 137, pou moins larzan. Li la di non. Mé li koné pa ziskakan li va nyabou koz konmsa.

Justin