An gro gouvèrnman i prétan li la trouv la klé pou mète demoune o travaye- é si zot la viz anou sé ké shé nou, néna pliss shomaz ké partou dan la franss « an proporssion » é ké néna pliss demoune i apèrssoi lo RSA é pou kossa d’apré zot ? Pars parétil bande shomèr i manke la formassyon, osinonsa na pwin la formassion k’i fo pou trouv travaye dann lo péi.

Alor la désside mète bande moune néna RSA dann in sorte l’anploi-formassion vin t’èr par somenn. Mète lé pov o travaye, mi pans sa in vyé rèv bande rish-sa pars solon zot la parèss-la kangn-la fine tèlman pran dsi lo moune ké lo moune –konm lo prézidan i di- i sava mèm pi travèrs shomin pou alé l’ote koté pou okipe in l’anploi lé a zot porté d’bra. Bravo pou la dékouvèrte.

Mi rapèl tré bien kan Mitterrandla fé lo rmi, nou téi antande partou, i fo pran konte lo I néna dann RMI é la si tèlman tienbo konte so famé I-insèssion- ké sa la pa marsh inn tyork. Apré sa shak promyé minist l’arivé, la désside li ossi mète bande shomèr o travaye san nyabou fèr. Si ni pran dopi 1981, zordi nou lé l’ané 2023 donk la fine pass 42 z’ané é sèl zafèr i pé propoze anou, bande péi l’outre-mèr sé arkomans konm néna pliss karantan.

Alor l’èr-la i sava fé kolok, i sava fé sobatkoz, i sava fé zétide pou konstate kan lo manda prézidan sar fini ké toute lé parèye : ké néna touzour in takon shomèr, ké la formassion lé touzour pa adapté par rapor bande post travaye lé pa okipé. Anfin va konstate zot ane lété k’inn bourik é toute zot bla-bla lété arienk pou anpèsh zot boush santi mové.

A bon antandèr,salu !