La vi lé shèr La Rényon. Sa lé sir ! Tout demoun i di sa. Mèm bann z’ankèt ofisyèl i amontr bann rézilta la. Mi sort lir dann in zournal i apèl “Le Figaro” tout in tralé konparézon rant bann pri dan la Frans épi bann pri La Rényon. Donk, pou viv isi, i fo plis l’arzan ké la-ba. Mé lo zournal moin la parl an-o la i di konmsa, in tyèr d’moun La Rényon i gingn bann minima sosyo. Ni koné galman, plis sinkant pour san d’moun lé dosou lo pa d’port la povrété. An parmi, na près vin pour san d’moun lé dan la mizèr. In Rényoné dsi sink lé dan la mizèr pou vréman.

Kan Paul Vergès i domann gouvèrnman pou donn dé san éro anplis bann moun pov pandan in koup de tan, moin lé sir, li pans an promyé bann moun mizèr épi sak lé d’sou lo pa d’port la povrété. A ! Bien sir, sé in domann ké li fé, pars nout kamarab na poin pouvoir pou li désid par li-mèm. Li lé sénatèr é li lé pa gouvèrnman ; Sa sé la konsékans in n’afèr k’i apèl la séparasyon bann pouvoir. Aprésa, kan ou i antann dann radyo é kan ou i lir dann zournal demoun apré gaskone son propozisyon, sirtou apré di sé pars z’éléksyon i ariv li di sa. Sa i an-nuy amoin in pé antann in n’afèr konmsa, pars Paul Vergès, sanm pou moin, la zamé fé in propozisyon pou in votaz. Mi koné pa in sèl onm politik lé kont la démagozi konm li. Si li fé in propozisyon konmsa zordi, sé pars, pou li, konm pou la mazorité d’moun, nou lé dan l’irzans sosyal. Demoun i an pé pi !

La bien trouv l’arzan, par milyar, pou angrès la bank. La bien trouv l’arzan pou alé kraz Kadhafi. Arzout èk sa tout lo bann gaspiyaz bann moun bien plasé la-ba dann Paris konm isi La Rényon. L’arzan pou bann moun mizèr i trouv pa ! Ziskakan ? Ziskatan kalbas i pèt afors alé rod dolo.

Justin