Biensir mi rapèl la loi dsu l’intérupsyon la grossess pou bann madam é fransh vérité mi pansn sa la évite in bonpé dram dan La franss. Mi rapèl galman la votasyon pou bann demoun sak la moinss dizuitan mé san édikasyon politik, avèk in l’informasyon manipilé sak i fé mwin lé inpé rézèrvé dsi lo rézilta. Mi rapèl galman bann gadjète prézidansyèl :la marséyèz pli dousman, kozman dann koinnfé, manzé sé l’moun san konté l’avyon roniflèr pétrol Mi panss pa, sof mon réspé, sa la shanj lo péi.
Bann mové lang sirman va parl diamant bokassa- in moun té pa in bone konpagni., déssèrtin ropa éspésyal, épi la shass rézèrvé pou tyé bann gayar zanimo l’afrik.Mi pans pa sa sé in gloir pou li !
Astèr, mi rapèl bann mové lodèr la politik kolonyal kan ziskar la fé lo trikmardaz li la fé dann bannzil komor.Mwin la fine di assé koman mi oi sète afèr-la san rodi ali asoir an détaye..Dizon pou fèr kourt La franss la amontr son vré figir kolonyal. In n’ot afèr ni doi bien kalkilé :Ziskar i vien prézidan l’ané 1974 : 28 zané apré la loi départman 1946 ébin li la zamé aksèp l’égalité rant demoun an franss é demoun issi-larzan karné sa la pa in l’égalité travèsti sa , trayi sa ? pou mwin oui.Mi rapèl ankor son provokasyon kan li téi fé son bann vizite térin.
Si pou vréman li téi vé kass bann kode konm i di, li l’avé lokazyon kass lo kode lo kolonyalism é li la pa fé. Zot va di amwin shakin i oi l’èr dsi son révèy.Mwin mi rogard l’èr dsi mon montr é mi ziz lo manda ziskarkonm prézidan lété pa in bon pèryod pou nou rényoné.. Biensir zot va dir amwin i rézime pa sètan an sète lign, mé pé donn in l’apèrsu.Apèrsu ké ziskar konm d’ot li lé ni gran, ni pti, ni bon ni mové an li mèm , mé pou nou té pa in bone afèr.