Mi koné pa si zot la romarké, mé koméla, i pass pa d’zour san k’i anons in progré dann l’itilizasyon bann motèr pou ékonomiz pétrol. Moin lé a dmandé, si toutinkou, demoun la vni pli intélizan, pli malin, si demoun i fé travay plis z’ot koko.
Ou lé pri dann lanboutéyaz ? Ala k’out loto i mète poin-mor épi i tiliz pi léssans ! Ou i frènn, ou i frènn mèm ? Tout dépans l’énèrzi pou fréné, motèr i ar-rann aou ! Loto i marsh èk léssans, i sharj bann batri épi motèr éléstrik i mète an marsh. Baya ! Oté, banna lé monstré foutor !

Na in bon koup de tan, moin l’avé antann in méssyé Panhard koz dann radyo : li té i ésplik, lané 1950 par-la, son lizine l’avé fé in loto, téi ansèrv moins léssans ké bann loto sinkantan apré, épi té i roul a pépré parèy ; mé la pa anpèsh méssyé Panhard fé fayite, épi banna la anvoy fèrfoute son linvansyon.

Moin la lir ossi, in zour in boug la invant in zanpoul éléstrik i iz, dizon près pa, i dir lontan mèm, mé li la pa gingn lotorizasyon pou mète son zanpoul dann komèrs. Sèrvis téknik la mète de boi sanm li.

Bann mové lang i di konmsa, nana byin lontan, bann lizine loto la arète fé loto éléstrik pars, a s’ki paré, lété pa rantab, mèm si demoun té i domann...
Bann lang la bil i di ossi, kan in moun i trouv in tik-tak in pé an avans, té i gaspiy pa lénèrzi, bann gran sosyété té i ashète lo brové, té i foute dann in kof, épi pèrsone l’avé poin lo droi aplik sa, sansa tansyon-pangar !

Alors, solon moin, la pa bann moun la vni pli madré, pli kalkilèr, pli invantèr, mé sé bann kapitalis la shanj téknik ; in pé solman, pa tro, ziskatan k’in zour, pétète la kriz sar fine passé épi zot va ar-gingn fé la plui épi lo bo tan. Ziskatan lanbéli i arvyin pou zot !

Justin