Oté

Zistoir Adamou lo pti zanfan tousèl zété dan la foré-promyé morso

Justin / 12 octob 2019

JPEG - 43.6 ko

Marmaye zot i koné l’Afrik ? Si zot i koné pa i fé pa rien pars kan zot va grandi zot nora lokazyon konète kontinan-la, kontinan-momon l’imanité. Laba mèm l’om modèrn lé né-nout zansète si zot i vé é sé a partir d’la zot la parti dsi la tèr é zot l’amène demoun ziska lo pli pti rokoin… Zot i koné tout demoun lé pa parèye, na poin mèm koulèr, na poin mèm tré donk zot i doi dir lé pa normal kan mi di tout demoun i sort laba, mèm landri ousa pou komansé l’avé par-la dis mil nout bann zansète. Poitan si é si tout demoun lé pa parèye ni pé dir sé par raport la natir, lo klima, lo manjé k’la manjé épi fason zot la viv dann péi zot la parti.

Kriké ! Kraké ! Kriké Mésyé ! Kraké Madam !
Dann tan-la, dann in vilaz i port lo non Gani-Gawané, demoun té i yèm pa okip bann z’orfélin, ni pé apèl bann zanfan tousèl pars zot momon té mor, zot papa té mor définitivman. Zot papy mi sipoz lété tro ma lad pou okip de zot. Donk demoun l’avé poin manzé pou done azot é in kaz pou zot dormi ; l’avé poin non pli in linz pou anpar in pé zot nidité, téi zète azot dann la foré. Dan la foré zot i koné, é mèm si zot i koné pa, zot i pé sipozé néna tout sort danzé : néna bann zanimo sovaz zot i pé oir si zot i vé dann dann dokimantèr la télé. Mi koné pa si zot osi bann pti rényoné zot noré pèr bann zanimo sovaz la. Pétète oui, pétète non é antouléka lété pa rar bann zorfélin l’afrik téi fé détrui azot par bann zanimo sovaz
Mi sava rakont azot listoir in pti marmaye téi apèl Adamou. Sa té in zanfan tousèl. Son momon té mor épi son papa l’avé maryé avèk in n’ot madam, mé oila son papa la gingn in maladi épi la kite lo mond ni koné pou alé dann l’ot ké ni koné pa. Son pti mèr l’avé zanfan é konm èl l’avé poin lo moyin okip Adamou èl la désid pèrd ali dann la foré. La pa éspas konm dann zistoir zot tout i koné zistoir Tizan sansa zistoir ti pousé, dann nout zistoir lo moun la pèrd Adamou dann la brouss loin mèm par raport son kaz é mèm si li l’avé fane ti galé blan atèr lété inposib ali rotrouv landroi li lé éné é ousa li sort.

Kriké ! Kraké ! Kriké Mésyé ! Kraké Madam !
Adamou l’artrouv ali tousèl an pami bann zanimo sovaz bann sèrpan sak i anval aou d’in kou san ké ou i konpran, bann léopar k’i krok aou ziska ké out zo i krok sou son dan, bann bèl zarnyé vénimé, épi tout in kantité monstr i sava i vien dann la foré. Sé pa si l’avé poin bébète galman landroi la zète lo pov pti marmaye.
Mé oila Adamou té in pti marmaye l’avé bone shans é d’apré sak i di bondyé téi vèye dsi li. Promyé soir kan li lété pèrdu, kan bann zanimo téi sava krok ali san pityé, ala ké li la nyabou kashyète dann in grote-in kavèrn si zot i vé é dann kavèrn-la, mi koné pa pou koué demouun l’avé kashyète in kantité provizyon pars sirman zot l’avé pèr in tribi ènmi i atak azot épi i lèss azot san manzé pou amenn azot sépa ou-pétète dann péi bourbon pou travaye konm zésklav. Antansyon mi di sa konmsa mé moin na poin prèv é mi koné pa kèl distans par raport péi bourbon lo vilaz lété
L’èrla, lo pti adamou kan li la trouv tousa bone shoz a manzé li la di, néna l’tan pou la mor, zordi alon viv. Adamou téi yèm la vi konm lé normal pars moin lé sir zot osi bann pti rényoné zot i yèm bien la vi é moin lé sir si zot osi zot l’avé trouv dann in kavèrn-konm la griote Sin-Pol in kantité manzé ramasé zot osi zot nora fé konm li. Zot noré fé konm lo pti marmaye l’afrik : pans a viv vi ké bann kondisyon lété réini pou sa.

Promyé morso lé fini-samdi k’i vi n nou va oir dézyèm