Oté

Zistoir Bébète l’avan i vien rann vizite Arnestine - dézyèm morso. Kan léspri zavan i rann vizite

Justin / 16 novanm 2019

JPEG - 43.6 ko

Nou rényoné ni pans moi d’novanm la pa in bon moi pou nou dsi la tèr. Dopi lontan nout famiy la fine dir anou : moi d’novanm I sort pa apré in sèrtènn èr. Moi d’novanm i fo méfyé pars lé riskab ariv anou n’inport de koi. Moi d’novanm bann zam la pa ramasé I plane in pé partou pou rode in kor pou rant dodan épi pou trouv in trankilité étèrnèl.
L’avé inn foi, pou inn bone foi, mésyé lo foi la manz son foi avèk in grinnsèL

Konm moin la di azot l’aprémidi Arnéstine téi invite son troi zamiz pou pass in néstan ansanm kisoi pou boir kafé, kisoi pou tourn in pti salad mang vèr-moi d’novanm, sa i mank pa sa sirtou o Por dann kèr ségnan. Kèr ségnan ? Lo nom déza i done aou la tranblad. Pou kosa lo landroi téi apèl konmsa ? Mi koné pa tro bien mé d’apré moin l’ariv dé shoz dann tan dann landroi-la.
Kan lo bann zamiz téi ariv zot t éi kriy : « Arnéstine ! Oté arnéstine ! ».L’èrla, lo jenn madam téi réponn : « Rant azot ! Rant ! ».. Toulmoun téi antann sa é mèm son pti mèr a prétann pars tazantan èl téi di : « Mon zanfan ! Réponn pa konmsa pars i koné pa kisa lé riskab prézant in zour ? ». Arnéstine l’avé koz de sa avèk Ti-Guy son shéri la krout, papa son pti bébé é Ti-Guy l’avé di aèl, solon li i fo ékout bann vyé moun pars banna néna léspèryans nou lé jenn, nou na poin é si i di aou méfyé, i fo méfyé.. La dsi zot téi arète pars konm kréol i di : sa in komansmann dispite é ti-Guy té pa in dispitèr . Tanka Arnéstine èl l’avé tro pou fèr pou alé ankor rode dispite avèk son bononm.
Kriké ! Kraké ! Kriké Mésyé ! Kraké Madam !

Anfin, zour – la, zour mi di azot l’afèr l’arivé, Arnéstine té apré fé bien prop son pti bébé an atandann d’mète ali dann son bèr pou ropozé. Son bann z’invité i tard pa é dann son tète èl téi atann déza z’ot vizit. Toudinkou èl-arnéstine-la antann in kriyé :
« Arnéstine ! Oté Arnéstine ! Moin l’arivé ! ». Arnéstine la di : « Rant ! Rant aou touzour ! ». Mé oila, pèrsone i rant pa. La voi i rodi : « Arnéstine ! Arnéstine ! Moin l’arivé. »
Arnéstine i fé pou répons : « Rant ! Rante aou ! Madam Klémansyène ! » pars dann son idé sété Madam Klémansyène l’avé arivé. Lété pa madam Ogis pars son voi lé pli gro. Lété pa non pli Madam zil donk lété Klémansyène mé pèrsone i rant pa . Lé vré lo l’alé lé in pé long mé kant mèm i mète pa si tan d’tan pou sort bordaz shomin pou arivé.
L’èrla Arnéstine i désid mète son pti baba dann son bèr épi zapré èl i di dann son kèr, èl v’alé ziska bordaz shomin pou oir kisa i lé si pèrsone la pankor arivé. Donk èl i poz lo baba dann son bèr, èl i artourn dann sézour-anfin konmsa téi apèl é toudinkou in spès kouran d’van fré la pasé, té konmsi la natir lété an sézisman. Lo tol la gadang-gadang in kou é lo tralé shien l’avé l’arète bouzé, l’arète fé zot wati-watia zot i fé tou lé zour dann la savane. Arnéstine la mète a tranm dsi so zanm…
Zistoir la pankor fini-troizyèm morso pou samdi proshin.