L’èrla Arnéstine i désid mète son pti baba dann son bèr épi zapré èl i di dann son kèr, èl v’alé ziska bordaz shomin pou oir kisa i lé, kisa i kriy épi i ariv pa zamé. Donk èl i poz lo baba dann son bèr, èl i artourn dann sézour-anfin konmsa téi apèl é toudinkou in spès kouran d’van fré la pasé, té konmsi la natir lété an sézisman. Lo tol la gadang-gadang in kou é lo tralé shien l’avé l’arète bouzé, l’arète fé zot wati-watia zot i fé tou lé zour dann la savane. Arnéstine la mète a tranm dsi so zanm…
L’avé inn foi pou inn bone foi, mésyé lo foi la manz son foi èk in grinn sèl !

Kosa Arnéstine i oi dovan èl ? In moun té pa in moun, avèk in linz té pa in linz, in léspri té pa in léspri, in spès gran madam lé dbout, konmsa, min dsi koté dann l’ankadroman d’la port. Arnéstine I ko npran in sèl kou d’ èye sak l’arivé… El i komans par fé pityé. El i di : « Mé kosa ou i fé la ? Kisa la done aou la pèrmisyon rant dann mon kaz ? »
- Kisa lo léspri i di, mé ou mèm la di amoin rant é konm ou la di amoin rant moin la rantré é astèr m’a dir aou kosa mi vien shèrché. Mi vien shèrch in kor pou mon am trouv lo ropo. In kor jenn, inosan é dakor pou ranpli la misyon mi sava done ali pou fé. Néna si tèlman lontan mon am lé an pèrdisyon ké moin la bézoin in vré kor pou trouv mon ropo. Pa la vote mé sète out ti baba sak i dor laba dann son bèr.
Kriké ! Kraké ! Kriké Mésyé ! Kraké Madam !

Arnéstine i fini pi plégné ! El i di : « Pran amoin si ou i vé, mé toush pa mon pti baba ! ». Lo léspri i réponn : ou néna poin zord pou done amoin ou la, sé moin ki komann, sé moin k’i désid ! Kart lé dann mon min épi léspri sé d’trap Arnéstine par la ké shové épi i trènn aèl ziska lo bèr son pti bébé. Arnéstine i plèr mèm, i souplègn par dsi souplègn, larm dolo i koul ziska la tèr.. Léspri i done sé zord : trap out bébé, port ali, ni sava simityèr nou la ! konmsa mi fini mon voiyaz léspri pèrdi.
Kan zot i anbèk la sorti lo troi i bite dosi klémansyène.L’ot i konpran tout suit sak la spassé é èl i di :« Madam Arnéstine moin l’amenn out komisyon moin la, moin l’amen n out ti boutèye lo bénite, aspèr in kou mi trap. ! »
Léspri la kanté épi la tonm dsi la zanm. Klémansyène la aspèrz ali kou d’lo bénite é léspri la dékol konm in fizé, la disparète dann in tourbiyon. La fé pshittt konm in balon apré dégonflé épi lparti sé parti, dispari pou dispari… lo pti bébé la plèr in kou, Arnestine la ropran konsyans épi Klémansienne la di : « Ma fiye, out mari l’avé rézon, kan la di aou lèss pa sak ou i koné rant dann out kaz konmsa. Ou i koné moi d’novanm sé in mové moi é tout zafèr i pé arivé so moi-la.
Mon zistoir la fini : si èl lé vré èl lé vré ! si èl lé mantèr la pa moin l’otèr. Koton mayi i koul ! Rosh i flote ! L’avé inn foi pou inn bone foi mésyé lo foi la manz son foi èk in grinn sèl

Zistoir la fini.