Oté

Zistoir Bik-Bok épi lo lyèv pri dann pyèz (promyé morso)

Justin / 11 out 2017

JPEG - 43.6 ko

L’avé inn foi pou inn bone foi, dann in kartyé, isi La Rényon l’avé in jenn garson téi apèl Zanmisèl. Pou viv, li té i poz la kol, li téi shass gèp, épi li té i fé avèk in boi golète épi in kord in pyèz pou lyèv, konm li té i fé galman gob pou trap zoizo. Avèk sa li téi gingn pa vréman son pourkoi mé tazantan li té i gingn in moné.

Donk, in nuite, li poz in pyèz pou lyèv é li amors lo pyèz avèk in morso manyok kri. Lyèv I yèm sa é lo pov zanimo, an dé tan, troi mouvman, lé pri dann la. Granmatin Zanmisèl I vien trap lo lyèv é li mète sa dann son tant kouvèrt. Li rant son kaz, mé pou ariv la-ba, I fo li pass dovan l’égliz. Ala ké li bite avèk Pèr Payet. Lo pèr I domann ali kosa li la trapé, li di, mon pèr moin la trap in bèl lyèv. Pèr Payet san tro domann son l’avi, i di ala sinkant éro, é alé oir lo kizinyèz é di aèl fé in bon sivé pou midi.

In n’éstan apré li trouv pèr Hoarau é i spas lo mèm z’afèr. In pé d’tan apré li trouv Pèr Ting-tang-Tong é mèm sénaryo. Mé Zanmisèl i sava rann in vizite son kopine é pou gingn son favèr li fé kui lo lyèv é dann son kèr li pans, si bann prète i vé lyèv, zot na ka alé la shas.

Kan i ariv l’èr pou manzé, lo troi prète lé dann sal a manzé : Pèr Payet i di : « Mi koné kosa nana pou manzé ! ». Pèr Hoareau i di : « Moin osi mi koné sak nana pou manzé ». Lo pèr ting-Tang-tong i di lo mèm z’afèr li osi . Mé ala ké lo kizinyèz i aport manzé, mé na poin lyèv pou manzé, zis in kl’omlète do zèf . Lo troi prète i pran la kolèr é zot ii di : « Zanmisèl la pa amenn lyèv don ? ». La kuizinyèz i di non, vi k’lété la vérité.

Bann prète lé an kolèr é zot i jir zot va fé in prosé lo Zanmisèl pou an avoir éskrok troi roprézantan lo sègnèr. Koton mayi i koul, rosh i flote, si zistoir lé man tèr la pa moin l’otèr.

(La pa fini, la suite pou domin)