Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Zistoir d’tang é d’in gran ralé poussé dann landerneau rényoné !

vandrodi 16 févrié 2024, sanm Justin


Mézami, mi yèmré anparl azot in pé zistoir tang. Zot i koné tang, pti mizo konm i di, adoré pou la manzaye par la moityé d’ bann rényoné, détèsté par l’ote moityé k’i yèmré pa oir pti zanimal-la an blan, an noir, konm an koulèr dsi zot zassyète.


Alor bien sir, dann Radio Freedom in gran sobatkoz téléfonik la éklaté avèk in pé pou di lo kontrèr d’sak lé zot i di é lé bien domaz sa i marsh konmsa pars mwin noré profèr antann bann syantifik rante dan la danss pou anparl anou zanimal la, épi lo risk li néna pou disparète ou pou pa disparète, pou ète an trop ti nonb, osinonsa an tro gran nonm.antouléka in vré zétide syantifik.

Sak mwin la antann sé ké néna a popré uite san pèrsone i shass tang issi la Rényon — antouléka néna uite san la désside pran zo pèrmi d’shass sète ané. San konté bien antandi bann brakonyé. K’i doizète nonbré konm bann shassèr ofissyèl d’apré mwin.

Problèm : néna in l’asosyassion la désside domann anil la date la rouvèrtir la shass é tribinal la suiv azot é bann shassèr lé bandé an trante siss pars an pliss i prévoi i n nouvèl date pou rouvèr, zistoman la date tang an voi d’famiye i antèr é i oi pi azot avan plizyèr somenn, in moi d’ran. Sé dir si bann shassèr lé kontan d’sa.

Mézami, mi yèmré dir azot nou rényoné konm bann morissien, épi d’ote pèp ankor noute bann zansète la konète détruir la bio divèrsité zordi noute lé apopré dakor pou k’i prézèrv la biodivèrssité — k’i prézèrv vréman é k’i détrui pa anmass avèk lintanssion prézèrvé.

Na suiv laktyalité pou oir koman sète istoir va évolyé… Mé oila ké sète aprémidi mi rouv mon radyo é kossa mi aparnn ? Mi papran k’in ga la désside fé lélvaz tang — li fé sa dopi lontan é li gingn kant mèm ranpli son bouzaron — mé oila ké sépa kèl lotorité la désside anpèsh lélvaz tang é o kou issi pèrsone i konpran pi arien é anko kou bann syantifik — si mi tronpe pa — lé o zaboné abssan.

Alé ! mi kite azot panss sak zot i vé é mèm pa panss arien si zot i vé mé antanssion ni parl la natir — ni parl kékshoz frazil é k’i fo prézèrvé.

A bon antandèr salu !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus