Dèrnyé foi moin la rakont azot kosa l’ariv Fondèr d’plon, avèk Transh Montagn. An touléka moin la rakont azot kosa lé dé konpèr la donn konm ésplikasyon par raport lo movèz pozisyon la trouv azot dodan : anmaré dann kabiné an sosison. Solon zot in bann demoun l’atak azot. Astèr alon oir la suit.
L’avé inn foi pou inn bone foi, mésyé lo foi la manz son foi èk in grinnsèl.

Troiziême zour, Dimilié i di :
« Ekoute : Azot, monte travay ! M’a rèst mon tour, m’a oir kosa bann demoun va fé sanm moin ! Kan v’ariv midi, m’a sonn la klosh pou zot nir manzé ! »
Lo dé bononm i sava, i mont dann la foré éi mète a travaye dir... Dimilyé son tour, i mète manzé o fé : bon manzé siouplé, dori basmati, kari bishik, rougay mang ! Dimilyé i sava pou sonn la klosh.
In gramoune — in vyé gramoune minm, koko prop, gran barb blan — i débark. Lo gramoune i di :
« Moin la fain. Manzé kui na poin lo mètr !
Dimilyé i fé pou répôns :
- Mi sonn la klosh, kank mon dë dalon i ariv, nï manz. Prépar out boush, an atandan.
- Out dë dalon i intérès pa moin dïtou, lo vyé boug i di, moin la fain, mi manz ! Mi manz touttsuit pou touttsuit ! »
E lï vë rante dan la kizine ! Dimilyé i arète alï :
« Non, vië boug ! Ou iatann toulmoune. Toulmoune i manz ansanm. »

Lo vië gramoune i èsèye pa sote dosi Dimilyé ! Kosto lo vyé ! For konm in kapor ! Sépa kisa lété ? Sépa in vyé gramoune pou vréman, konm in vyé bransh gouyav la manz kabri maron. Sépa sète… zot i oi zot mèm… sète nana la kë ploté par déyèr an roulo d’ korde-la, néna dë korn Touléka té vayan lo gramoune d’apré sak mi oi té lo dyab mèm sa.!
Kriké ! Kraké ! Kriké Mésyé ! Kraké Madam !

Mé soman èk Dimilyé lï la tonb tar ! Dimilyé la kapaye sa ! La pass in klé malgash dann kolé sa. Aprésa, Dimilyé la trape son baton, la fish dan la tér, l’anmar lo gramoune avèk. Par la barbe. La trap lo barb la fé troi tour dann bout baton-Zot i koné baton Dimilyé la, dizon in bèl boo d’fèr, soup konm pa posib, dir konm zot i véré mèm pa zordi dan la natir épi soupl konm in fouète-in gro fouète solamn.
Fondër-d’plon, Transh-Montagn lé pou travay dann bitasyon : la klosh i sonn, i apèl pou manzé. Inn i di l’ot : la band demoune la pa vnï zordï, don ? I fo kroir la pa vni.

Zot i ariv anba la kaz : toute lé normal. Dimilyé asiz, trankil. Pti-pti niyaz i pass dann sièl. Sik-sik i shante dann pié manyok. Lodèr kari i ral. Lo dé i trap in zasyèt pou tir manzé ? Zot i vé pass a tab tab mé Dimilyé i kal azot.
Zistoir la pankor fini-troizyèm bout la fini.