Oté

Zistoir Dimilyé épi Grandyab- dèrnyé bout la ké lo zistoir.

Zistoir i kalbite.

Justin / 6 janvier 2019

Moin la fine dir azot sak l’ariv Fondèr d’plon épi Transh montagne lo dé promyé zour.Lé shoz la pa bien éspasé pou zot.Troizyèm zour Dimilyé i di : »Mon tour pou résté pou kui mnzé m’a oir kosa lo troupo d’moun l’atak azot i fé avèk moin. Mé lé shoz i spas spa konm pou lo dé promyé zour.L’èr pou sone la klosh i ariv normalman é lo dé kon pèr i sava pou tir zot manjé mé Dimilyé i kal azot.

L’avé inn foi pou innn bone foi, mésyé lo foi la manz son foi èk in grinn sèl.

Donk Dimilyé i di : « Zot i koné la bann demoune la artourn ankor zordi., zot l’atak amoin osi. ».Lo dé konpèr lé zéné zéné mèm.zot i koz pa lé konmsi zot i grongn par l’intéryèr zot gozyé.

Dimilyé i amenn Fondèr d’plon avèk Transh-montagn dan la kour , li mont azot lo vyé gramoun kapayé anmaré avèk lo baton Dimilyé.

Apré li di lo dé konpèr : « Ala z’ot bann demoun la ! Sa la pa z’ot bann demoun ! Lo dé konpèr i gingn pi fé fas si tèlman zot lé onté.

Mé Dimilyé i di lo dé boug : « Pran shakinn in bon boi épi koriz amoin so malfondé la.Mé sirtou tap pa dsi la barb pars lo vyé malapri va dégaj ali épizapré va baré ».

Transh-Montagn, Fondër d’plon i arète pa kami lontan. Sé d’ trape shakinn son baton : bababanm, bababanm ! I kongn, I kongn mèm ;Lo vyé gramoun donk lo dyab pars té lo dyab I kriye l’asasin.I kriy Oiye ! Oiye ! Oiye ! Pityé siouplé ! Pityé ! zot va tyé amoin ! Mi arfé arpi ! Mi arfé arpi !

Ek la kolér in kou la bate desi la barbe ! Lo gramoune la pa demann son restan, la lofé, oui ! La plane dan lé z-èr par dsi bann kaz an irlan.

L’èrla,Dimilyé la di :alon manzé éstèr.

Kank la lev kouvertïr marmite, lodèr osi la levé ! Sa té i ral ! Touléka la ral amoin. Moin la parti demann in pti boute ! La réponse zot la fé amoin sé t’in koutpyé dann mon l’aryèr trin,l’anvoy amoin isi pou moin rakonte azot sa zistoir-la !

Si zistoir lé mantèr, la pa moin l’otèr.Koton mayi i koul, rosh i flote.L’avé inn foi pou inn bone foi mésyé lo foi la manz son foi avèk in grinn sèl.Dopi so tan-la , li arète pa kriyé avèk in voi l’outre-tonm : « Rann amoin mon foi ! Rann amoin mon foi ! »

Zistoir Dimilyé avèk Grandyab-Zistoir la fini.

Justin