L’avé inn foi, mésyé lo foi, la manz son foi èk in grinn sèl.

Samdi pasé nou la komans rakont in pé zistoir granmèr kal épi sète son pti zanfan té i apèl ti Kala. Nou laté fine dir Granmèr kal étan zésklav son mètr la domann aèl pou soign son zanfan l’avé gingn in mové fyèv. Konm Granmèr kal l’avé gingn in don pou soign demoun an dé tan troi mouvman lo marmaye lété guéri.

Kriké mésyé ! Kriké madam ! La taye dann out sak, la klé dann mon posh !

Konm lo mètr l’avé promète li la ardonn Granmèr kal épi son pti zanfan ti Kala son libèrté é konm la loi téi obliz lo mètr la done lo vyé madam in karo la tèr pou viv dosi é pou débrouye son kari dan la vi. Solman lo karo la tèr té dan lé o é pou ariv la vil téi falé marsh lontan épi konm travaye lo vyé madam la rant z’angazé la kaz son l’ansien mètr épi matin o soir èl té blizé trimé : trimé pou marshé pou sort son kaz pou alé son travaye, trimé lo soir pou sort son travaye pou rant son kaz, trimé la zourné pou fé mèm travaye èl téi fé dann tan èl lété zésklav.

Anplis ké sa, èl té i doi lèv bonèr pou fé kui manzé pou son pti zanfan, lav son linz, nétoiye son boukan pou pa viv dann la salté. Souvan défoi èl téi di dann son kèr : « Mondyé ségnèr, ou la fé rogagn amoin mon libèrté épi sète mon pti zanfan, mé mèm sa, la vi lé dir pou vréman. » Granmèr kal té i arète pa souplégné.

Kriké mésyé ! Kraké madam ! La taye dann out sak ! La klé dann mon posh !

Astèr tout la zourné èl téi lèss son pti zanfan Pti Kala dann son kaz épi lo zalantour. El té i di ali, rès la kaz, alé pa vangué pars l’avé dann tan-la bonpé bon a rien té i rode arienk fé lo mal in pé partou dann la kanpagn épi dann boi. Pti kala la promète bien rès trankil lo kaz mé afors tan té i pass, li té i annuiye ali bonpé. Konm li té fine ropèr l’èr son granmèr i sort son kaz épi l’èr èl i rotourn, lo marmaye la pran l’abitid bate son karé. Pou komansé li té i tourn in pé dann lé z’anviron épi li la komans alé pli loin.

Pli loin li la trouv bann vagabon é li la mète son vi dann danzé. In zour banna l’asonm ali kou d’galé épi la kapote son kor dann basin trou pilon.

Kriké Mésyé ! Kraké madam ! L’avé inn foi mésyé lo foi la manz son foi èk in grinnsèl.

(Zistoir la pankor fini)