Oté

Zistoir Granmèr Kal - sétyèm morso-la finisyon

Justin / 19 mars 2018

JPEG - 43.6 ko

Konm nou la vi dann sizyèm morso Ti-Kala la fini par aksèp sort dann Basin Trou Pilon pou artourn l’androi li viv avèk son granmèr é d’apré sak mi kroi li la aksèp fèr sa pou suiv in promèss son granmèr l’avé fé-èl mèm l’avé ro prann in promès son vyé famiy l’avé fé galman. Donk li la aksépté é son vyé granmèr la promète kado ali lo don mi anparl avèk zot . Astèr la lézann granmèr Kal i komans.

L’avé in foi mésyé lo foi la manz son foi èk in grinnsèl.

Dabor i komans par in l’évènman in pé inkroiyab sanm pou moin. Ala sak l’arivé d’apré sak bann vyé moun la rakont amoin : I paré, kan Granmèr Kal la parti rode ti-Kala dann lé o, désèrtin moun mal fondé la suiv aèl é konm zot la pa vi aèl resort dann Basin trou Pilon, zot la pans èl l’avé noiyé. Mé kan èl la arsort avèk ti Kala, lo troi kat moun té apré véyé la gingn in gran sézisman é in pé la pass koté d’tanto. Boudikont, zot la pète l’of !

Kriké Mésyé ! Kraké Madam ! La klé dann mon posh, la taye dann out sak.

Si tèlman désèrtin l’avé pans Granmèr Kal l’avé vanj kont bann l’asasin Ti Kala. L’èrla, lo sèl nom Granmèr kal té i fé tranm désèrtin avèk la pèr konm fèye doboi i tranm dann van l’ivèrDann tout mézon mé sirtou dan sète bann blan, sansa sète bann kolonm, sansa sète bann firabra, lo nom Granmèr kal té i déklansh in mouvmann pèr é pou obliz marmaye kisoi rant z’ot kaz, kisoi lav z’ot pyé dann bandèj, Kisoi manz z’ot soso, lo bann nénene téi ménas apèl Granmèr kal. Sa té in ménas éfikas é moin mèm mi souvien nout kaz l’avé in nénen Izabèl é kan èl té i émite lo kriyé granmèr Kal, tout bann zanfan l’avé la pétosh.

KrikéMé syé ! Kraké madam ! La klé dann out posh, la taye dann mon sak.

Mé pou bann moun sinp sa lété pa lo bon l’imaz Granmèr Kal. Son bon l’imaz lété kan èl té i fé lo bien dann z’alantour ; kisoi kan èl té i donn in bon tizane sinp, kisoi kan èl té i zète in sor dsi l’moun mové, kisoi ankor kan èl té i ède bann momon akoush bann madam dann bon kondisyon. Lo bon l’imaz lété pa granmèr Kal la térèr, mé granmèr kal la providans bann moun fèb, bann moun malad épi bann moun pov. Mi pans lété d’apré sak in pé la di amoin Granmèr kal lo robélyo, é sa sé in n’afèr i bote amoin bien.

Mon zistoir lé fini ! Sak i di li lé mantèr pou moin sé zot néna in bataye avèk la vérité. Koton mayi i koul ! rosh i flote ! L’avé inn foi mésyé lo foi la manz son foi èk in grinnsèl.

La Fini