Oté

Zistoir Granmèr Kal-sinkyèm morso

Justin / 12 mars 2018

JPEG - 43.6 ko

Samdi, nou la fine oir Granmèr Kal la parti Basin Trou Pilon, pars dann son rèv èl la vi plizyèr foi lo basin si tèlman k’èl la fini par pans son pti zanfan lété dann basin-la. Solman oila, si èl lé sir li lé dann fon basin-la, èl i koné pa koman èl va tir ali la-dan. Ala k’èl l’apré rodé koman i fo fé pou tir lo zanfan dann lo, san noiyé èl mèm. Ni sava oir zordi si èl va nyabou fé sa, avèk lo don son famiy l’afrik l’avé donn aèl.

L’avé inn foi ! Pou innn bone foi ! Mésyé lo foi, la manz son foi èk in grinn sèl !

Granmèr Kal, konm moin la fine dir l’avé in don èl l’avé érite son bann vyé famiy téi sort l’Afrik. Mé in don sé in don é i manyé p n’inport koman. Dizon i fo akonpagn ali avèk la priyèr épi in zanr sérémoni : kass koko, tiliz safran an poud, donn lo frui, la toil, épi tout sort kalité zépis. Kan ou la fine fé sa, ou i lir dan la sand lo bann prévizyon Donk Granmèr Ka la fé lé shoz konm i fo fèr é ala sak li la lir. Ala plito sak bondyé i di ali i sava spassé ; èl va nyabou tir son pti zanfan dann basin, mèm si basin néna in profondèr. Arzout avèk sa, son pti zanfan va arviv pars èl va nybou résisite ali.

Kriké Mésyé ! Kraké Madam ! La klé dann mon sak ! La taye dann out posh !

Ala ké lo vyé granmèr Kal la plonj dann in lo fré vèye pa koman épi o fon Baya. El la naj rant-rant bann zèrb fèye larz. Ziskatan èl la fini par trouv son pti kala rakokiyé dann fon basin. Lo vyé granmèr la kokiye koté son pti zanfan. In gran konvèrsasyon la angaj rant lo granmèr é lo pti zanfan. Lo vyé fanm la domann lo pti marmaye si li lé bien l’androi li lé, si li vé rès la, é si é sa. Lo pti zanfan la réponn li plé pa li l’androi li lé, mé li plé pal mi non pli kan li té dsi la tèr. Boudikont, li atann kosa son vyé granmèr i propoz ali, pou désid si li rèss la, sansa si li kite l’androi, sansa ankor si li désid vol dann l’inivèr pou ziska détan é dé tan.

Kriké Mésyé ! Kraké Madam ! La klé dann mon posh ! La taye dann out sak !

Pti Kala, Pti Kala, pou kosa ou i rèstré l’androi ou i lé ? Pou kosa ou i sort ré pa dann fonn lo ? Dopi si tèlman lontan nou lé ansanm mi oi pa kosa noré d’myé ké sort dann lo pou kontinyé la vi dsi la tèr ! Lo pti garson la réponn : Granmèr, Granmèr i plé pa moin viv konm mi viv dèrnyé tan. Moin l’asé viv konmsa. Lé vré ban voiyou la tyé amoin mé pou moin la mor té konm in délivrans... Pti Kala ! Pti Kala ! Jenn konm ou i lé, out vi la pa fini. Suiv amoin an déor basin nou va kontinyé nout vi konm i konvien.

(La pankor fini)