Oté

Zistoir granmèr Kal-sizyèm morso

Justin / 17 mars 2018

JPEG - 43.6 ko

Dann sinkyèm morso nou la fine oir Granmèr kal la trouv son pti zanfan Pti Kala dann fon Basin Trou Pilon. Lo granmèr la fé in pti sèrvis épi li la nazé pou artrouv Pti-Kala asiz dann fon basin. Sirpriz lo zanfan i vé pa vréman sort dann fon basin pars d’apré sak li di avèk son gran-mèr, li plé pa li dann l’androi zot i viv, li épi lo vyé madam. Tousèl tout in zourné sa in n’afèr i bote pa li. Donk ala lo granmèr avèk son pti zanfan apré diskité, asiz dann fon d’lo dsi la rosh lisé par kouran.

L’avé inn foi mésyé lo foi la manz son foi èk in grinn sèl.

Gran-mèr kal la pran rant an réfléksyon. L’arète kozé in gran n’instan mèm épi la la ropran la parol. El la di : « Pti Kala ! Pti Kala ! Ou i di amoin sa zordi alé oir dopi plizyèr zour mi rod aou, mi rod aou mèm. Moin la fé bonpé la priyèr mèm moin la mète an kolèr kont lo bann la fé aou di mal. Pti kala ou i pé pa afront amoin konmsa. Moin sé out granmèr ! Moin la ramas aou dopi lo zour kan out momon la disparète ! Ou i pé pa fèr amoin in n’afèr konmsa ! »

Mé lo pti Kala la réponn aèl konmsa : « Granmèr, mi koné tousala, mé la pa sa va fé shanj amoin mon l’intansyon pars momon mi rapèl pi d’èl é moin lé fatigé la vi mi amenn dopi nou la instal dann boi ! »

Kriké Mésyé ! Kraké madam ! La klé dann mon posh, la taye dann out sak !

Lo Granmèr kal la ropran la parol. El la di konmsa : « Pti Kala ! Pti Kala ! Ou sé mon sèl famiy koméla é ou i pé pa abandone amoin sansa ou lé konm kondané fé lo bébète Zavan ziska ké la tèr va arèt tourné ! ziska ké solèy va arète briyé ! Dopi mon aryèr vyé famiy, mi koné sé ou k’i doi pran ma suite kan bondyé va désid l’èr l’arivé pou fèrm mon zyé. Apré ou sar out zanfan, é apré out zanfan lo zanfann out zanfan. In gran famiy l’afrik konm nou na poin lo droi disparète pars nou néna nout déstin pou kontinyé. »

Pti Kala i kalkil, kalkil mèm é pou finir li réponn : « Si lé konmsa Granmèr m’a suiv aou ! Ma sort dann basin ! M’alé ziska nout boukan pars lé vré i fo in déstiné i akonpli... L’èrla Pti Kala la naz an montan konm in sirène é son vyé granmèr la nazé galman parèye pou sort dann basin. Ala zot i sort dann basin tou lé dé dann kèr gro solèy midi.

Kriké Mé syé ! Kraké madam ! La klé dann mon posh, la taye dann mon sak, l’avéinn foi mésyé lo foi la manz son foi avèk in grinnsèl.

(sizyèm morso la fini, ni artrouv pli d’van pou sétyèm)