Samdi nou la fine oir in bann vakabon la tyé Ti-Kala épi la zète ali dann basin trou pilon. Kosa i sava spassé éstèr kan Son gran-mèr va sort travaye pou artourn son kaz. Kosa v’arivé kan li trouv ar pi Ti-Kala ?

Kriké Mésyé ! Kraké Madam ! L’avé in foi mésyé lo foi la manz son foi avèk in grinn sèl.

Gran-Mèr kal i sort travaye pou alé son kaz. Fatigé ! Fatigé ! mi di azot. Pétète ankor pli fatigé ké dann tan èl té zésklav la kaz bann blan. El i grinp dann santyé, èl i grinp mèm. Na dé moman, èl i arète in pé pou ropran l’éspirasyon. Dann in n’éstan èl sar fine ariv son kaz pou artrouv son pti zanfan-son konsolasyon.

Ala k’èl i ariv dovan son boukan. Fénète lé rouvèr, la port galman. El néna konm in présantiman, mé par l’fète toultan èl néna présantiman-la. Dann fon son kèr èl i pans son pti zanfan lé mor ! Alé oir, la plipar d’tan la pavré… Sirman Ti-kala lé dann l’aryèr kour apré zoué avèk son lapin, sansa in n’ot zanimo. El i kontourn lo kaz mé èl i oi pa li. El i apèl mé na arienk l’éko i réponn aèl. I komans fé noir é ti-Kala lé pa la. Li v’arivé, sa lé sir. Pou kosa par l’fète li arivré pa. El i kriy, el i kriy mèm :

« Ti-Kala ! Tikala ! Otoué ti-kala ! Ousa ki lé toué ? »

Mé na arienk léko pou réponn aèl.

……

Kriké Mésyé ! Kraké Madam ! La klé dann mon posh ! la taye dann out sak !

Néna plizyèr zour Gran-mèr Kal l’apré rode son pti zanfan. Afors èl i pingn pa son shévé lé an touk. Rob sal, mèm in pé déshiré par zépïng, san manzé, sof dé pti gout dolo . El i rode, el i rode mèm lo pti marmaye san trouvé. Ousa i lé pti marmaye-la ? Mor, sansa vivan ! Kosa l’ariv ali ? Pou kosa li la parti konmsa. El téi vé amenn lo marmaye dann travaye, mé lo blan la fé konprann aèl èl lé pi zésklav é son pti zanfan lé malvéni. Pétète li pans marmaye – la lé volèr alé oir in si zantiy pti zanfan i rès avèk èl dopi touzour. Salté d’Blan ! konmsa moin lé pi zésklav alé oir moin lé plisk’avan ankor. Kèl déstiné Mon Dyé Ségnèr.

KrikéMésyé ! Kraké Madam ! La klé dann mon posh ! Lataye dann mon sak !

Tazantan èl i gingn somèye é dann son somèye èl i oi in basin, in gran profounder, tayé dann gale. Sa la pa basin trou pilon sa ? La pa la-dan son pti zanfan la tonbé.domin èl v’alé oir. Si li léladan i fo èl i tir ali ; la pa pou arien son gropèr la fé kado aèl in don konm nou la fine oir komansman zistoir-la... Lé vré lo don sé pou guéri d’moun mé i pé ansèrv in n’ot shoz ankor… Si li té pèrmète aèl tir son pti zanfan dann basiin. Avèk lo don la ou i koné zamé. Son gropèr l’avé di aèl sa : in vré l’afrikin i sort l’afri, In vré kaf l’avé débark lil bourbon an zésklav, é son famiy l’avé fé son l’édikasyon. Landomin gran matin, solèye i rèv pa lové, Granmèr kal i marsh i marsh mèm diréksyon basin trou pilon : el lé sir è li sava trouv son pti dann l’androi-la é si èl i trouv ali la poinn rézon èl i amenn pa li son kaz. La vi va arkomans konm avan. An myé biensir ! An myé toulbon !

Kriké Mésyé ! Kriké madam ! L’avé inn foi mésyé lo foi la manz son foi èk in grinnsèl !

(Zistoir la pankor fini-proshène foi katriyèm morso)