Oté

Zistoir Jano avèk son troi kabri-morso niméro -1-

Justin / 5 novanm 2018

JPEG - 43.6 ko

Jano l’avé troi kabri : inn té blan, inn té maron é l’ot lété noir. Shak gran matin lo marmaye téi amenn son troi shèv manzé dann lo méyèr karo zèrb li té i pé trouvé. Lo zour mi di azot la, Jano la lèv bonèr épi li la parti avèk son shèv, diréksyon in karo zèrb Laba dann lé o Boi d’nèf Sind-dni.
L’avé inn foi pou inn bone foi mésyé lo foi la manz son foi avèk in grinn sèl !
Landroi Jano té i pass l’avé in karo patat klotiré avèk in griyaz é shak foi li té i pass koté lo karo patat li téi di konmsa : « Si in zour néna in bèl trou dann griyaz, koman mi débrouye mon kari avèk so bann shèv-la ? ». Zistoman lo matin mi anparl azot ala ké Jano i oi in gro trou dann griyaz é bann shèv zot osi zot i oi sa épi, malèr d’malèr, malèr d’maléré ala lo troi shèv i travèrs la klotir é i rant dann karo patat é la, lèss azot fé déga.
Jano, li osi li rant dann lo karo é ki avèk in galé, ki avèk in boi li mète a fé kour son troi shèv, mé lo shèv i s’anfoutsa. Zot i sote a droit, zot i sote a gosh é Jano i pé pa fé arien pou fé sort azot dann karo… L’èrla Jano i arsort dann karo épi i asiz dsi in rosh é li mète a gropléré.
In moush a myèl i pass présé pars li sava bitine in karo flèr, li la fine ropéré, mé kan li oi lo pov marmaye apré pléré li arbate aryèr épi li di lo Jano :
« Jano, akoz ou i plèr ?
- Mi plèr pars mon troi kabri i dézobéi amoin é anplis zot l’apré mète lo kao dann karo patat mésyé Blan-Léo-la. Pou sa mèm mi plèr, é mi rode inn pou ède amoin fé sort mon bann kabri. »
Moush-a-myèl i kalkil épi li di :
« Mésyé Jano, mi pé fé sort out kabri déor par pityé pou out sagrin mé kosa ou i done moin ?
- Mi done aou sak ou i vé provi ké la pa tro difisil pou fèr, é i kout pa tro shèr ! »
Lé dé i fé shèk pou fé oir zot lé bien dakor

Kriké ! Kraké ! La klé dann mon posh, la taye dann ouit sak.

La suite pou zoinal mardi.