Kriké ! Kraké ! Kriké Mésyé ! Kraké Madam !
Donk in zour, plito in nuite Mardé i sava la pèsh zangiy. Dann tan l’avé kant mèm pa mal de zangiy dann basin blé. Mé konm i di : néna dé foi i bèk, néna dé foi i bèk pa é mèm kan ou i amors out mi d’shoka avèk zoli zoli vèr d’ tèr. Donk so nuite la Mardé la pa trap inn tyork. Tazantan li la konm sézi in frémisman son lign mé san rézilta. Dépitasyon i pran dsi li. Li di : « Bondyé, ou i koné moin sé in bon pratikan. Ou i koné mi mank pa bann pli gran fète néna dann la rolijyon. Ou i koné osi mi fé mon karème plizyèr foi dan l’ané. Malgré tousa, ou i lèss amoin alé la pèsh san trap arien ditou. In gran nuite san trap arien… Moin lé paré pou fé in promès si sé pou gingn trap in zangiy ».

Li la pankor di sa, ala ké li trap in zoli-zoli zangiy. Bien kosto ! bien gran ! B ien bon pou manzé ! San di mèrsi li trap lo zangiy li mète dann son tant kouvèrt. Konm lo zour la fine kléré, li prépar pou alé shé son shé soi. Mé, sépa kosa la pass dan son tète, toudinkou li majine Bondyé la pa vréman korèk avèk li é avann sort dann lo li di… ala kosa li di :
« A ! bondyé ! Koméla i fo flate aou pou gingn in n’afèr ! »
Akoz li la di sa, mi koné pa. Mé sak mi koné sé ké lo zangiy la filoshé, la sort dann tante, la gliss dann galé é mèm si li la mank bate son déyèr atèr, li la pi gingn trap son proi la shapé… L’èr-la, d’apré sak i di, Mardé, larm dann son zyé la di avèk Bondyé la-o dann son nyaz :
« A bon ! Koméla na pi moiyin plézanté avèk ou ! In pti parol an tro é oila k’ i pèrd sak ou la fine trapé… Mèrsi bien, mi obliyar pa la loson ! »

In n’ot tonbé pou lo zistoir :
Mardé, larm dann son zyé, la di, an rogardan an-o dann niyaz landroi li pans bondyé i lé : « Ou in bon makro ! Mèrsi ! »… Mi pans pa in rényoné té kapab di in n’afèr konmsa, pars Bondyé, konm zot i koné, i pini pa galé.
Si zistoir lé vré, li lé vré . Si zistoir lé mantèr, la pa moin l’otèr. Mi vann azot sa konm moin l’ashté.