Donk, lé dé konpèr la kol shomin. Zot i marsh, zot i marsh : la plui li ! solèye li ! LLo van li ! I diré na poin arien pou arète azot. Laramé i trouv sa in pé bizar mé zot i koné kan ou la fé l’armé ou i étone pi aou pou granshoz. Li pans son dalon i doi konète ousa li sava. Pou l’instan li oi solman lo boug i pous dovan.

Afors pous dovan zot la fini par ariv koté in kaz : laté pa la kaz in roi, sa lé sir, mé la kaz in famiy néna lo voul an konsékans. Demoun l’apré pléré, l’apré kriyé. In vré rashmann kèr ! Lé dé konpèr lé a d’mandé kosa l’ariv bann moun la pou tonm dann la dépitasyon konmsa. Ala ké zot i oi in boug i fé l’èr in pé sèryé, déza in gro gramoun – anfIn in moun ou i pé koz ansanm pars lé z’ot kont pa dsi, vi k’i diré zot la fine pète kab dsi kab é dizon karéman i diré zot la fine pèrd la rézon.

Dalon d’Laramé i domann : « Mésyé, mi oi zot lé dann shagrin. Kosa l’arivé ? ». Lo boug i réponn : « Nout papa i sava mor pars in vilin maladi i vé anport ali koté d’tanto. Lo ral lé dsi ! ». Lo dalon i di : « Mi vé bien sèye géri z’ot papa moin pars moin néna in don ! ». Zot i koné kan ou lé dann in ka konmsa, ou lé paré pou fé konfyans ninport a kisa... Lo ga i di li lé dakor.

Kriké Mésyé ! Kraké Madam ! Koton Mayi i koul !! Rosh I flote !

Li amenn Laramé avèk son dalon dann in shanm in vyé gramoun l’apré atann l’èr. Lo dalon i domann in tono, in ash, dosèl avèk dolo épi li prévien i fo pa kal ali dann sak li l’apré fé pars si i kal ali son afèr i réisira pa.

Ala ké li di Laramé koup lo boug an morso, mète dann tono, mète do sèl in bon doz dolo épi arklout la bonde dsi lo tono. La famiy i komans trakasé é sa lé normal. Laramé i komans rogard shomin pou kouri an ka k’la koup la manké. Dalon Laramé i signal lo moun pa kozé. Li fé dé troi simagré épi li di Laramé déklout la bond. Laramé i fé é ala k’in moun jenn, bien kosto, bone santé é tout i sort dann tono é i arpran son plas shèf pars té li loshèf famiy.

Tout domoun lé kontan, i domann kosa zot i vé an pèyeman. Lo dalon i réponn :« Nou la pa bézoin pèyman ! zis dé katsou : inn pou moin, inn pou Laramé. Laramé lo pti pé dsan i bouy . Dann son kèr li pans l’avé in bon moné pou ralé é ala sète éspès kouyon i domann arienk dé katsou.

(La pankor fini)-L’avé inn foi, pou inn bone foi, mésyé lo foi la manz son foi èk in grinn sèl. Sizistoir lé mantèr, la pa moin l’otèr.