Oté

Zistoir Laramé-katriyèm morso

Justin / 14 avril 2018

JPEG - 43.6 ko

Bondyé l’avé di Laramé : fé pa sak mi fé, fé solman sak mi di aou fé. Mé konm nou la vi Laramé néna tèt dir é oila ké li sèye amont Bondyé koman li lé bon. Lé vré Bondyé i dovine par avans lo mové plan lo vyé solda é li port antansyon sak son konpagnon l’apré fé. Solman bondyé lé bon, sé pou sa i apèl ali Bondyé bondyé i suiv sak Laramé l’apr é fé dsi la tèr.

L’avé inn foi, mésyé lo foi la manz son foi èk in grinn sèl.

Donk Laramé i pé pa s’anpèsh propoz son l’ède in bann propriyértèr in karo mapinm. Ala ké li di banna li lé kapab ramas tout lo zépi mapinm avan la plui i ariv. Ala ké banna lé dakor é i donn ali in boite zalimète. Ala ké li mète dofé dann karo mapinm é ala ké lo fé i bril dann in n’instan total é kapital. Mé kan lo bann ramasér mapinm i ariv shé zot na poin in sèl bal mapinm dann farfar. Oté ! Banna i rode tyé lo Laramé. I réklam ali lo rékolt é biensir li gingn pa rann azot z’ot bien.

Laramé i san son poi lé o fé éli domann Bondyé : Bondyé nout dé ou i koné anou bien, Ou i oi dann kèl traka moin lé la ? Tir amoin d’afèr… mi rofèr ar pi. Konm Bondyélé konplézan avèk Laramé, i vien vite a son sékour é toutsuit pou toutsuit in kantité sak mapinm i anpil inn dsi l’ot dann farfar é bann moun i tonm dakor avèk Laramé. Vitman vitman, i kui manzé, vitman vitman i fé salad avèk rogaye san konté in vèr d’vin silaos é l’afèr lé fète.

Kan i domann Laramé kosa li vé an pèyman son bon travaye, li réponn : donn amoin inn-dé katsou é sar mon pèyman pou zordi. Bondyé dann syèl i di : lé bien Laramé, ou la pa tir banna o ki é sa sé in bon n’afèr. Astèr pran out shomin, mète aou an rout épi kontinyé bate out karé.

Kriké Mésyé ! Kraké madam ! La klé dann mon posh ! La taye dann out sak ! L’avé inn foi mésyé lo foi la manz son foi èk in grinnsèl.

Laramé i marsh, i marsh, i marsh mèm. Li la fine fé in bon distans é konm son vant lé plin, konm somèye i pèz ali atèr, li déside dor in pé an atandan solèye i lèv é li ropran son shomin. Li lé sitèlman fatigé, li tonm si tèlmann somèye ké san tardé li ral son karang ziska landomin.

Zistoir la pankor fini-i tard pa ni artrouv sin kyèm morso.