Zot i souvien kan Laramé, avèk lo son violon, la fé dans lo Prète dann sapan. Lo sèrvitèr di Ségnèr lété martirizé é pa pou plézanté. Donk li la port son plint, mé konm lo vyé solda téi pass son tan pou vavangé gosh a droit la loi téi gingn pa mète la min dsi li pou fé son prosé ziska k’in zour la fini par kapaye ali. Vit fé, bien fé la zisytis la kondane lo boug é anplis kondané a mor. Sèryé sa !
L’avé inn foi mésyé lo foi la manz son foi èk in grinnsèl !

Lo zour lo l’égzékisyon l’arivé. Donk la mont lo léshafo dann la kour la prizon. La konvok in bouro pou manyé lo giyotine, la fé vni in prète, la fé vni in luisyé épi in doktèr pou konstate la mortalité. Lo prète la dans dann sapan té la galman. L’èrla, la fine lir lo zizman é i arèss arienk pou koup lo kou. Mé d’apré sak i prétan néna in formalité pou fé avan é i apèl sa lo dèrnyé volonté. Mi koné pa si zot lété dann in ka konmsa, kosa zot nora domandé pars l’androi ou i sava ou la pa bézoin granshoz. I paré inn-dé i domann in dèrnyé sigarète d’ot d’ot ti kouyonad konmsa.
Kriké Mésyé ! Kraké madam ! Koton mayi i koul, rosh i flote !

Donk la domann laramé kosa k’li vé pou son dèrnyé volonté é lo vyé solda la réponn : ”Mi vé zoué in pti kou d’violon !.”. Lo prète la mète a kriyé konm in koshon l’apré pike. Li la di : ”I fo pa less ali zoué violon pars son violon sé la malédiksyon. Mé zot I koné, I paré, in dèrnyé volonté sa lé sakré é I pé pa éskiv in n’afèr konmsa. Mé lo prète I kriy mèm ! Lo jij I di ali : ”In pé d’dignité mon pèr, vi koné bien mi pé pa rofiz in kondané son dèrnyé volonté… Alé ! Donn ali son violon pou li zoué in kou !“
Laramé la trap son violon é la mète a zoué : tilili ! tilili ! tilili ! ala ké lo moun la mète a dansé pars rapèl azot kosa bindyé l’avé di. L’avé di ali tout sak va antann lo son out violon va dansé é lété vré réèlman : tilili ! tilili ! tilili ! Demoun dsi l’ban i lèv, i dans i maye dann ban i tonb atèr. Lo prète i dans galman an kriyan é son grann robe i aùmaye dann lo pti mobilyé ! Bouro i sort anlèr i kalbite dann fon. Lo ziz i tonm.
Laramé I oi déga dan lé zalantour, li kontinyé zoué, épi li trap son sak mazik épi son fiziy. Ala ké li sort dann l’androi é kan li ariv déor, li ramas son violon épi li pran la poud l’éskanpète.
Laramé lé sové pou in kou, éli arkomans in period vavangaz in pé partou dann péi-in pé loin pou pa pèrsone artrouv ali. In pé i di la vi ali par isi ! D’ot i di la vi ali parla ! D’ot ankor la pa vi mé la antann dir demoun la vi ali é néna ziska sak la vi in moun, i di in kamarad la vi ali. Mé li lé konm lo firé. Final de kont pèrsone i gingn pa mète la min dsi li é Laramé la kontinyé viv ankor in bon koup de tan.
Zistoir la pa nkor fini-dizyèm morso I atann anou.