Oté

Zistoir Laramé-onzyèm morso : Laramé lé dann paradi, boudikont !

Justin / 2 juin 2018

JPEG - 43.6 ko

Paradi la pa bézoin Laramé. L’anfèr la pa bézoin lo vyé solda non pli. Ala li artourn dovan la port Paradi . Li pé kant mèm pa vni in z’am érant pou dé-troi kouyonad li la fé dsi la tèr.I fo li tash moiyin rant kékpar. Ala li asiz d’van la port paradi épi li kalkil, li kalkil, li kalkil mèm.
L’avé in foi, pou inn bone foi, mésyé lo foi la manz son foi èk in grinn sèl.

Ala li lé dann in l’androi li koné mèm pa. Lé forsé pars sé in l’androi ou i pass arienk in foi dann la vi apré la vi. Laramé, pou son par la pass dé foi. Son sak majik avèk li,- listoir mi koné i di pa moin kosa li la fé avèk son vyolon épi son fiziy-an touléka, d’apré sak mon papa la rakont amoin, son sak té la. Déza bien, mé kosa i fé ansanm sa ?
Li désid tok dsi la port Paradi, Sin-Pyèr i ariv épi i d’mann ali : « Kosa ou vé ankor Laramé ? La di aou out nom lé pa marké dann mon rézis. Kansa ou sar in pé konpréansif kant mèm ! ». Laramé i fé pou répons : « Mésyé Sin-Pyèr ousa mi pé alé d’apré vou ? Pèrsone i vé pa d’moin épi mi vé pa vni in l’am érant. Mète mon sak anndan avèk ou ! Sé tout sak moin néna é mi voudré pa in shapardèr i souk sa pou li . Mon sèl bien sé sa. »
Sin-Pyèr la pankor di oui, ké Laramé l’apré mark son plan dann son tète. Kan la port la fine rofèrmé, li di solman bann ti paroli la : « Mi vé z’ète dann mon sak mazik, l’androi li lé. »
Li la pankor di sa, li travèrs lo mir é wap ! li lé dann son sak. Li bououuj pi !
Kriké mésyé ! kraké Madam ! la klé dann mon posh ! La taye dann out sak !

Li antan Sin-Pyèr i marsh dann la nuit lo paradi. Son soulyé i fé : tok ! tok ! tok ! tok ! Laramé i lèv in pè la tèt pou oir kosa néna dan lé zalantour. Li arbès tout suit é pou finir sak i dové arivé i ariv. Sin-Pyèr i koins ali épi li di : « Mi gingn pi fé arien avèk ou, mi fé apèl Bondyé ! ». Bondyé i ariv é li domann kosa la spasé. Sin Pyèr i asplik sak li l’avé pou aspliké ! Laramé i asplik galman sak li néna pou aspliké. Final de kont, Bondyé i fini par dir : « Laramé ! Ou l’arivé don ? Sin-Pyèr rode in bon plas pou mon vyé zami ». Oila koman Laramé la rant dann paradi . Mi pans li lé ankor pars kan ou i rant la dan sé pou toultan. Ala in légzanp i amontr anou, i vo myé an avoir a fèr avèk Bondyé plito ké son bann sin.
Mon zistoir lé fini. Mèrsi mon papa la rakont amoin sa é konm i di : « Si zistoir lé mantèr, la pa moin l’otèr ! Koton mayi i koul, rosh i flote.L’avé in foi, pou in bone foi, mésyé lo foi la manz son foi èk in grinnsèl. »
Zistoir lé fini