Oté

Zistoir Laramé-sétyèm morso

Justin / 5 mé 2018

JPEG - 43.6 ko

Bondyé, onm li téi vé Laramé téi rès trankil, la dnn lo boug in fizi, in vyolon, avèk in sak. Li pans, avèk troi zoutiy konmsa ? Laramé nora pa bézoin alé annuir d’moun, pars avèk sa li pé gingn son vi, san volé, onèteman dizon é sirtou san fé bétiz. Mé oila, lo vyé solda, sanm pou moin, sa té in moun téi yèm ravazé é fé rès ali tranki i doizète in pé dir.
L’avé inn foi, mésyé lo foi, la manz son foi èk in grinn sèl

Ala ké Laramé i kol shomin.ala ké li marsh, li marsh, li marsh mèm san rode vréman po alé kékpar, pars l’androi li lé, lé bien loin par raport son péi. Kan solètye lé in pé o dann syèl, li arète in pé ; li kalkil talèr l’èr mané v’arivé é li la pankor prévu son grayou. Ala in bann zoizo la poz dovan li. Litrap son fizy, li aopiy avèk son l’indèks dsi la ké d’détant. Fiziy i pète for, pars lo kartoush té i douz parla, é dann tan-la l’avé poin bon pé dézord dann l’androi.
In takon zoizo la antann son fiziy pété i tonm atèr, rède konm la zistis. L’èrla Laramé i donn zinstriksyon so sak é an in n’éstan son sak lé plin avèk zoizo. Ala son kari asiré épliké asiré solon moi.
Kriké mésyé ! Kraké madam ! koton mayi i koul ! rosh I flote !

In prète I mète a pasé é li oi kantité zoizo atèr. Li di lo Laramé : « Mon fis ou la kol in bonpé zoizo ! Ou i pèrmète amoin ramas in pé ? ». Laramé i di oui é oila lo pèr apré trap zoizo dann sapan épi korbèye d’or. Mé oila, Laramé in boug kiryé : li la fine oir son fizy l’éfé sa I fé ; li la fine oir son sak majigador kosa la fine fé. I rèss arienk lo violon pou fé son prèv.
Li tir son violon dann son ous épi li komans zoué : tilil, tiloulou, tiloulou, tilili. Violon-la lé majigador poulbon ! Lo bann note i grinn sou son l’arshé. Lo pèr i mète a dansé dann zépine. Maléré li kriye ! arète avèk out violon ansorsyéré ! Arète éspès de kriminèl !.. Laramé, i kontinyé zoué, li lèv épi li kol shomin, li sava. Kan li lé loin, son mizik i arète, é lo pèr i arète dansé.