Oté

Zistoir Laramé-sinkyèm morso

Justin / 21 avril 2018

JPEG - 43.6 ko

Donk Bondyé l’avé di Laramé, lo l’ansien solda défroké, fé pa sak li fé mé fé sak li va done ali l’atorizasyon pou fé. Laramé, la tète lé dir, é li pans dann fon son kèr li osi lé kapab fé lo majigador konm Bondyé i koné fé-mirak i apèl sa kan sé Bondyé i fé. Konm zot la vi, in pé plis, lo l’ansien solda lété riskab fé bate son mayi kan li la sèye fé in maji pou ramas mayi mapinm demoun. Rozman Bondyé la done ali kou d’min é lé shoz la fini par bien tourné é Laramé la promète li fèr ar pi in kékshoz konmsa. Promès sé dète é ni sava oir si lo boug i tienbo sansa non.
L’avé inn foi, pou inn bone foi, mésyé lo foi la manj son foi pou in grinn sèl.

Laramé i sort shé bann plantèr mapinm, li kol shomin, li sava. La nui la pankor tonbé, mé la pa loin donk lo ga i shèrch in l’androi pou mète son kanpman. Si posib in l’androi an sékirité dann tout poinn vizé. Ala ké li pass dovan in gran kaz bien ékléré partou. Lo moun i rès la néna lo moiyin : sa lé sir. Mé ala ké Laramé i antann demoun apré pléré-gro pléré siouplé ! Konm si in gran malèr l’atak azot. Laramé i rant dan la kour, li kriy la poin pèrsone épi promyé moun i ariv li domann kosa la éspasé.

Lo moun i di son vyé momon i tard pa pass koté d’tanto par viéyès épi par maladi. Madam-la néna in bonpé zanfan é pti zanfan é tout i plèr an mèm tan sé dir si i fé pa in gro tapaz, sé dir galman si z’ot shagrin la pa kontajyé. Laramé lo kèr lé fèb kant mèm é li lé a d’mandé si na poin in moiyin pou moiyéné pou ède in pé bann moun-la pou soulaz azot dann shagrin la vi. Bondyé, dann son paradi, i signal Lo vyé solda li la fé in promèss é in promès sa i fo ou lé réspéktyé d’li. Mé Laramé lé pi la avèk sa é ala ké li di lo moun, li pans li pé fé arni zènn lo vyé madam i tard pa pass koté d’tanto.

Dann in ka konmsa ou i kalkil pi é ou i di akoz pa. Laramé, i di lo bann zanfan koup lo madam an kartyé konm pou fé salé, mète dann in tono, do sèl avèk dolo épi arboush bien lo tono. Lo moun i fé épi Laramé i fé inn-dé majigador é li di rouv ! Riyin i éspass, lo madam lé touzour an morso. Demoun lé ankolèr, i fé konprann Laramé li osi i sa transform an salé. Lo vyé solda i koné kan i san l’aye é li konpran bien banna la fine boush son shomin é pi moiyin éskivé.

Sé l’èr Laramé gard bondyé dann syèl é li di :"Bondyé mi ogrète bien an avoir anbèk dann in n’afèr onmsa mé si ou i ède amoin in dèrnyé foi, mi rofé ar pi !" ? Bondyé néna in fèb pou Laramé é dann dé tan, troi mouvman in jenn madam i sort dann tono é son bann famiy i arète pi pou bate la min. Si tèlman zot lé kontan.
Vitman vitman lo moun i roganiz in fète. Manzé boir néna pou mète é kan i domann Kèl pèyman pou in si bone aksyon Laramé i di inn-dé katsou sa i sifi ali. Banna i donn li in pogné pyès é li kol shomin li sava. Ala in n’afèr rondman méné Laramé i di dann son kèr é son promèss li la fine anvoye sa fèr fout.
Kriké mésyé ! Kraké madam ! La klé dann mon posh, la taye dann out sak.

Sinkyèm morso lé fini sizyèm lé pa tro loin