Momandoné Bondyé lé fatigé kan li oi son dalon Laramé apré fé la kouyonad dsi la tèr. Donk li pans li va trouv in bon n’afèr pou boug-la konmsa li pans l’ot v’arète avèk tousa la kouyonad nou lé fine oir dopiplizyèr somenn.

L’avé inn foi, pou inn bone foi mésyé lo foi la manz son foi avèk in grinnsèl.

Donk in zour bondyé la dsann dsi la tèr pou rann in vizite son dalon Laramé. Sa i sâss in soir tar kan, dann son paradi, Bondyé la fine fé son zourné. Li la débark sibite konmsa koté Laramé ; l’ot la soté épi li la di : ou la fé pèr amoin !… Bondyé la fé pou répons : akoz ou la soté, ou i koné bien mi vé pa ou d’mal ; an kontrèr mi vé lo bien pou ou. La prèv, moin l’amenn troi kado pou kado aou.

Laramé lé kontan gingn kado, pars li lé konm nou, li yèm sa. In pti kado sa i antrotien bien l’amityé. Donk troi kado sé pi d’lamour, sé d’la raz.sé d’la zantiyèss puisans sink.

Bondyé i kalm ali épi i di ali : si mi kado aou inndé z’afèr sé pou fé arète aou trankil pars si ou i arès pa trankil mi pé asir aou, mi fé pi in kont avèk ou ; Laramé i ri dann son vant pars la pa zordi li koné bondyé é konm li di : « Lyèv i koné son zèrb ! é Laramé i koné féblès bondyé ! »

Kriké Mésyé ! Kraké Madam ! Koton mayi i koul, rosh i flote !

Donk Bondyé I ropran, ala troi kado po ou : Ala in violan, tout sak va antann o son out violon va mète a dansé ! Ala in fizi. Tout zoizo va antann out fizi pété va tonbé rèd tyé. Ala in sak : tout sak ou i vé sar dann out sak é anmaré.

Laramé i gard tout bann kado épi li rofléshi pou mazine kosa li sava fé avèk lot roi kado-la. Final de kont sa sé in n’afèr i komans fé travaye son tète. Sa la pa in pyèz sa ? Kisa i di amoin sa i fonksyone ? si i fonksyone, sé pou mon bien, sé pa pou mon bien ? Pars zot i konpran Laramé sé in vyé solda, donk li pans an promyé dann kèl pyèz i vé ral ali, mèm si i vé pa ral ali ditou dann pyèz. Aprésa, moin lé sir, li va prann tout lo bann risk i fo é pétète li va kriy, abnkor in kou bondyé o sékour.

Konm li la poin in répons pou lo késtyon li poz ali, ala ké li mète ali anrout épi li komans ankor in kou bate in gran karé konm li néna l’abitid dopi in bon koup de tan : dopi li la kite l’armé é li la fé la rankont avèk Bondyé. Donk, li marsh, li marsh li marsh mèm é li désid alé dann tout péi, in pé partou, pou vizité, é sirtou pou arète annuir ali, vi k’avèk son bann kado, solon li li va nyabou gingn son soso konm k’i fo.

Kriké Méyé ! Kraké madam ! la klé dann mon posh ! lataye dann out sak ! sizyèm morso la fini, i tard pa sétyèm morso pou komansé.

La pankor fini.