L’avé inn foi pou inn bone foi mésyé lo foi la manz son foi èk in grinnsèl. Ala ké lo bébète Homandraikisantano la désid manz la fiy lo roi. Lo roi i pé pa fé otroman k’aksépté, é sa fiy i di ali si sé son tour èl i aksèp èl osi son siplis.

Ala ké dann la foré, i aparète in briyan shovalyé, dsi son zoli shoval noir avèk son in lépé épi son boukliyé. Koupé promyé lang blé épi mète sa dann in tant malgash. In dézyèm lang i ariv son tour é lo jenn-jan i koup lo dézyèm lang san pityé. Aprésa li koup, lo troizyèm, lo katriyèm, sinkyèm, siszyèm. Li mète lo sis dann son tant… Ala lo sétyèm lang i ariv son tour, fatigé, apré plégné, lo do vouté konm in vyé rosh mé lo jenn jan i koup lo sétyèm lang in sèl kou avèk son lépé san pardone lo mové bébète Homandraikisantano.
O sétyèm lang i sava li osi dann tant sézi épi li arzoinn lo sis z’ot lang..lo jenn jan la koup la kord téi amar la prinsèss épi li la ramenn son soubik avèk li avèk an plis in zoli zano la fiy lo roi l’avé donn ali an rékonpans pou son kouraz épi pou son sakrifis. Mé la fiy i domann lo roi kisa la sov aèl épi la sov galman lo roiyome. Lo roi la di li va anvoye bann batèr tanbour pou di sak la sov la prinsèss vien dann palé pars la bézoin konète ali.
Kriké ! Kraké ! Kriké Mésyé ! Kraké Madam !

In pé d’tan aprésa dé zenn zan la prézant dann shato. Zot la ésplik lo roi, zot konba fini, zot la parti pars zot téi koné pa si lo roi nora vouli oir azot ou pa. Lo roi kontan l’amenn lo dé jenn jan oir son fiy épi li la di : ala bann sovèr lo roiyome, mé la prinsèss lété pa kontan antann in n’afèr konmsa. El lété tris an mèm tan pa rotrouv sak èl téi vé rotrouvé.
Kék zour apré l’ariv in jenn jan dsi in shoval noir avèk in soubik ranpli la lang Bébète é avèk an plis in zoli zano la prinsès l’avé done ali La prinsèss la rokonète son bienfértèr é sé èl la prézant sa lo roi, son papa. Listoir i di shakinn rant lé troi la gingn in kado : lo dé promyé mantèr la gingn in volé kou d’shabouk dési zot aryèr é lo jenn jan sak l’avé di la vérité la maryé avèk la prinsès.
Kan la fé lo maryaz lo roi la domann lo pèp pou vnir dann lo shato. Li la di, li néna dismil bèf, shakinn i tyé sak li vé pars li vé toulmoun i manz la vyann. Li la done do sèl galman é pi luil é li la done larzan pou sak té i vé rotourn zot mor dann tonbo. Li la kontinyé amenn son règn an sazèss ziska k’in zour la mor la pran ali pou alé l’ot koté. Son bopèr mor li la vni roi é pandan lontan li la fé règn la pé dann lo roiyome.

Si zistoir lé vré, li lé vré. Si zistoir lé mantèr la pa moin l’otèr é mésyé lo foi irode touzour son foi li koné pi ousa i lé éoui li arète pa domandé : Okilé mon foi ! Okilé mon foi !

Zistoir la fini.