L’avé inn foi pou inn bone foi, mésyé lo foi la manz son foi avèk in grinnsèl

L’avé inn foi, dann in gran lak Madégaskar in bébète. Li l’avé sète lang é shak ané li téi réklam in moun pou li manzé. Lak-la té i apèl lak Doany é li lété dann roiyom in gran roi demoun téi apèl ali Tsiromandidy. Lo monstré téi apèl Homandraikisantano é li lété in mové bébète é shak ané, mèm moi, mèm nuite, lo roi téi oi dann son mové rèv lo moun téi falé donn lo monstr pou manzé..
Bon sizé li, mové sizé li, li l’avé poin in tik-tak pou sové Sète nuite apré lo mové rèv lo gran roi l’avé fé,.bann solda téi amar la pèrsone avèk in poto dopi lo gran matin. Lo d’lo lak téi mète pou bouyoné, é in gran lang dofé téi sor dann lak… Zamé té i oi pa la tète lo bébète, arienk in gran lang blé té i ranp dsi d’lo épi té i trap la pèrsone épi téi ral aèl dann fon lo lak. Fini pou èl, lo bébète téi manz aèl. Plizyèr pèrsone l’avé pou misyon d’rogard lo sakrifis mé téi falé zot téi rèss dann in foré lo pli loin posib-o moins san mète par rapor lo poto téi sèrv pou anmar lo viktime. Anplis ké sa, téi défann pléré, lo shagrin té défandi, é tout l’afèr téi doi s’pass dann kalm épi la trankilité.
Kriké-Kraké ! Kriké Mésyé ! Kraké Madam !

Sète ané, mi anparl azot, laté in mové l’ané pou vréman. Dann so nrèv lo gran roi Tsiromandidy la vi an rèv son zanfan tou sèl. Son prop fit ! son sèl prinsèss. Lo roi l’apèl son fiy épi li la di aèl : « Sète ané lo bébète Homakisantano, la désid sé ou ké li doi manzé é kont in désizyon konmsa la poin arien pou fé. La fiy la réponn son papa lo gran roi mi sort di lo nom an-o la.-Tsiromandidy li téi apèl.
La prinsèss la réponn son papa : si sète foi si sé mon tur, la pa bézoin fé sosusi pou moin mi rokilra pa dovan lo sakrifis pars tout sa lé mor avan moin, pour sur, zot osi zot lété pa kontan mor manzé par lo vilin bébète kriyèl. Zot osi noré bien èm viv ankor pli lontan. Papa, mon roi, moin lé paré pou lo sakrifis é la pa bézoin trakass aou pou sa. Trakass pa ou pou sa !
Sète zour la fine éspasé é bann solda i trap la prinsès épi i amar aèl avèk in poto. Lo d’lo lak Doany i komans bouyoné é n gran lang blé i aparète.el i fons tout vitèss dsi la prinsèss dann la diréksyon la jenn fiy. Paré pou lalang dyabolik trapaèl ! Paré pou ral aèl dann fon lo gran lak moin la fine dir azot koman li apèl lo lak Doany.

Zistoir la pankor fini-samdi k’i vien nou va lir lo dézyèm bout.