Mi di pa, tazantan i fo fé konmsa kansréti pou done légzanpe ; mé tazantan, lé bon konète galman wi nyabou gingn trape oute bite kan wi antropran kékshoz. In légzanpe, pars lé touzour myé kan i pé di in légzanpe-sa i done kouraz mi panss. Dann la somenn mwin la lire dann Témoignages lé tèrminé avèk la pèr nou l’avé pou la koush l’ozone : nou l’avé pèr afors té apré foute lo trou d’dan, li disparète pars si sa téi ariv, dizon fini pou la vi dsi la tèr-antouléka fini avèk la vi umène é sète la plipar bande zanimo.

Ebin lé fini avèk bande trou dan la koush lozone. Pou koué, pars l’imanité la pran lo bande déssizion k’i fo pou arète avèk bande gaz téi provoke sète afèr-la. Romarke azot bien, toussa la pa fé an in zour pars bande lizine - kapitalist pou la plipar - abityé gingn zot gro larzan san forssé avèk bande téknik danzéré té pa prèssé pou fé lo nésséssèr. In traka an moinss pou nou, mé néna ankore bonpé zafère pou fé, avan la vi i arvien pli natirèl dsi la tère.

Toussa pou dire, konm David Gauvin, rédaktère dann nout zoinal i di, avan fé in n’afère, é avan domande demoune fé in n’afèr i vo myé konète sa i ansèrv kékshoz. Pars si i ansèrv pa arien mi oi pa pou kossa i sava fé ali… Par l’fète mi vé kante mèm done inn suite listoir lo kolibri épi lo fé d’foré. I prétan, mézami, kan bande zanimo la vi sak lo kolibri té apré fé, toute la mète la min ansanb pou ponp dolo dann lof lève amazone épi la étinde dofé.

In gayar zistoir ! zot i trouv pa ? É si l’ome si intélizan téi pran modèl dossi bande zanimo, mi panss nou noré viktoir pou ranporté.

NB avèk lo bien émab otorizassion zoinal Témoignages, sète Elie Hoarau mwin la mark lo nom épi sète Davide Gauvin mwin la sité lo nom.