L’avé arienk in pti zanfan té i kontinyé fé in konte èk son pépé é in zour son paran la romarke li té apré travaye in boute do boi pou fé in n’afèr ansanm. Mé kossa oziss ? Té pa fassil savoir ! La pa ké li téi vé pa dire, mé son famiy té i oze pa domandé. Poitan in zour la poz ali lo késtyon pou konète é li la réponde avèk in sourir an transh papaye :

« Mwin l’apré fère bol do boi épi kiyèr pou alé ansanm ; konmsa kan zot sar vyé é mwin sar fine gran, z’ot bol épi z’ot kuiyèr sar paré vi k’mwin la pran l’avans pou fère sa ! »

Aprésa lo marmaye la kontinyé fé son travaye mé landomin la bèl fiy la ramène son bo pèr a tab, la arsorte la véssèl pou li é kan la soup sansa dolo téi vèrss, èl té la pou suiyé,.. el té la galman kan bande pti traka la vi téi mank pa pou prézanté. La vi la ropran konm avan mème avèk son bann konplikassyon. Mé la vi néna son bon koté épi son mové koté. Mé la vi lé konmsa : in tan pou manz pin blan, in tan pou manz pin noir, in tan pou do ri Ségon, in tan pou manz ranpang mé inn konm l’ot i fo aksépté. La vi sé sa non !

Si mi rakonte azot zistoir la, sé konm mwin la di pars nou la diskite an parmi biensir é pars nout paran la fé konprande anou la solidarité rant famiy : in min i lav l’ot ! Sa la pa in parol an lèr mé in règ do vi. Sirtou, atann pa zote vyé famiy i sava pou rogrète sak zot la pa fé. Lo rogré i vien apré la mor ! Lé vré, mé aplik azot pou pa tro an avoir : lo moins possib, sé lo myé !

La fini

Justin