Moin té fine obli zistoir la. I fo dir moin l’avé trouv sa dann mon liv léktir nana pli lontan ké lontan, mé sa sé in n’afèr la mark amoin in bonpé épi nou l’avé diskite an famiy avèk papa épi momon pétète ankor inn dé frèr pli gran pou bien konprannn lo sans sète afèr la…

Donk, l’avé in foi in gramoun, traka lo tan té fine mont dsi li. Li té i gingn pi travaye pou vréman, la min téi tranm, marshé lété difisil pou li. Son garson avèk son bèl fiy té i komans trouv li té in sharj pou zot. Sirtou lo bèl fiy kan téi fo lav linz sal lo vyé bononm, kan la soup téi vèrs a tèr é téi fo suiyé. Parl pi kan tout sort ti traka la vi la komans tonm dsi li konm sak i apèl l’inkontinans épi la dyaré mal kontrolé. Mèm son manyèr manzé son bèl fiy téi siport pa. Pli pir i diré li té gate la vi son famiy.

Si tèlman in zour la mète in pti tab a par pou li manjé. La mète in li a par dann in rokoin é pou pa li kass la vésèl, la donn ali in pti bol do boi. Sa té i ansèrv pou manjé, pou noir la soup, pou boir kafé é pou akonpagn lo pti bol do boi la donn ali in kiyèr an boi galman... Lo pov vyé bononm dann son koin la komans tassé, konmsi la vi firamézir té i rotir dann son kor.

Poitan sa lété solid étan jenn, épi li té i konomiz pa son fors pou grandi son bann zanfan, ziska in zour son madam la désote la vi é l’èrla li la komans dékaniyé. La bèl fiy, mèm lo garson té i gard ali zour pou zour an dsou, an domandan, dann z’ot kèr, kansa Bondyé nora té soulaz azot in traka konmsa. Mé oplis lo tan té i pass, oplis li té la, moins an moins vivan mé vivan kant mèm.

La pankor fini