Zistoir pti bol doboi

Donk, l’avé in foi in gramoun traka lo tan té fine monte dsi li. Li té i gingn pi travaye pou vréman, la min téi tranb-tranb, marshé lété difisil pou li. Son garson avèk son bèl fiy té i komans trouv li té in sharj pou zot. Sirtou lo bèl fiy kan téi fo lav linz sal lo vyé bononm, kan la soup téi vèrs a tèr é téi fo suiyé. Parl pi kan tout sort pti traka la vi la komanss tonm dsi li konm sak i apèl l’inkontinans épi la dyaré mal kontrolé. Mèm son manyèr manzé son bèl fiy téi siport pi. Pli pir i diré li téi gate la vi son famiy.

Si tèlman in zour la mète in pti tab a par pou li manjé… La mète in li a par dann in rokoin é pou pa li kass la véssèl la donn ali in pti bol do boi. Sa té i ansèrv pou manjé, pou boir la soup, pou boir kafé é pou akonpagn lo pti bol do boi la donn ali in kiyèr an boi galman. Lo pov vyé bononm dann son koin la komans tassé, konmsi la vi firamézir té i rotir dann son kor.

Poitan sa lété solid étan jenn, épi li té i konomiz pa son fors pou grandi son bande zanfan, ziska in zour son madam la désote la vi é l’èrla li la komanss dékaniyé pou vréman. La bèl fiy, mèm lo garson té i gard ali zour pou zour an dsou, an domandan, dann z’ot kèr, kansa Bondyé nora té soulaz azot in traka konmsa. Mé opliss lo tan té i pass, opliss li té la, mwinzanmwinss vivan mé vivan kante mèm.

La pankor fini

Justin