Konm moin lé fine dir azot la kaz lo marènn Ptiboutmoun lété déza in bonpé dan léo. La pa la otèr la Plène, mé kant mèm dann landroi, dann tan mi di azot la, l’aprémidi l’avé briyar é si dann lé ba la plui i tonm pa souvan, l’androi-la lé pa rar dsi l’kou d’troizèr-katrèr téi tonm in pti grinn plui. Si l’avé poin la plui, l’avé kant mèm la rozé é sa téi rafréshi in pé l’èr… Pou kosa mi di azot sa, sinploman pou fé konète azot kan i di Piton Boi d’nèf lé dan lé o, lé dan lé o pou d’bon.
L’avé inn foi pou inn bone foi, mésyé lo foi la manz son foi èk in grinn sèl.

Kan lété fine désote la kaz marènn Ptiboutmoun téi pass dovan kék kaz avann ariv la foré. Dé pa mèm épi ou téi travèrs dovan la kaz madam Gran-Barb. La pa ké lo madam l’avé gran barb, mé son défin mari, in sèrtin Richard, banna téi i kriye ali Richar Gran barb, pars li l’avé gran barb pou vréman. Malgré son mortalité demoun l’avé pran labitid apèl lo madam konm moin la di azot an-o la. Lan droi-la tout la famiy é i kashyète in pé é té i anvoye Ptiboutoun alé domann siouplé. Lo zanfan téi sava-li té si tèlman zantiy, si tèlman sèrvyab !-
Si mi di azot madam Granbarb l’avé in shien roké é shien-la lété kaziman mové épi sournoi épi an trète . Lo pti marmaye l’avé pa pèr lo shien-la, pars li té i ariv ammadoué lo zanimo. Li té i fé klak in pé son lang : tak-tak-tak-tak-tak. Sansa li téi tap pti klak, pti klak, dsi son molé. Aprésa, ti dousman, ti dousman li téi karèss lo shien, kontan vèye pa, li téi tourn son déyèr, li téi fé bate son ké dsi la zanm lo pti marmaye, é li téi s’anplègn in pti pé. Kan té fine ariv konmsa l o pti marmaye téi pé rant dan l’alé madam Gran-Barb é li té i kriye : « Poin pèrsone ! Poin pèrsone ! »… san fé mont la kolèr lo shien.
Kriké mésyé ! Kraké madam ! La klé dann mon posh, la taye dann out sak !

Antansyon si t i sava la kaz madam Gran-Barb laté pa vréman pou domann siouplé. Lété sinploman pou oir si lo madam té i vé pa in paké d ’boi, sansa in pé tizane sinp kisoi bann fèye, kisoi lékors, kisoi ankor bann rasine é tout sak i s’ansui, sansa ankor in pé flèr lo famiy téi sava rode dann plato flèr.
A ! Plato flèr, sa in n’afèr demoun téi yèm. In zardin dann tan lontan la kaz in blan. La kaz té pi la mé lo zardin té la ankor in pé an dézord, in pé an fouyi, mé in kantité varyété plant in kroiyab si mi di azot. La-dan bann parfin flèr téi mélanj inn avèk l’ot, bann koulèr osi té i done ali l’èr in zardin éstraordinèr konm in vyé shantèr lontan téi shant. L’avé galman bann zoizo, bann papiyon tout koulèr. In pé téi di tazantan tang ti mizo téi pass galman épi lyèv épi lézar é tout sak i fé ké la natir i rèss la natir.
Astèr ni rovien in pé shé madam Gran-Barb. Kan èl la antann son shien Déméloir-A oui ! Moin la obli dir azot lo nom lo shien mé son nom lé té konm mi sort dir azot-donk kan èl la antann son shien Déméloir apré pouss son pti plègnman, èl la konprann toutsuit in moun l’avé rant dan son l’alé é èl la pans toutsuit sé Ptiboutmoun pars l’avé li tousè, é kapab apèz lo shien konmsa, amadoué ali vitman-vitman...
Piboutmoun la di : « Bonzour madam ! » é lo madam la réponn : « Bonjour mon zanfan ! ». Kosa m’a dir azot tout demoun té i yèm pti Marmaye-la.

Troizyèm morso la fini-samdi k’i vien nou va oir lo katriyèm morso.