Mé zami, mon bann dalon, koméla néna lo corona virus mé konm zot i koné dopi lontan nou la fine konète in paké d’lépidémi-mèm désèrtin pandémi. Moin pèrsonèl, mi rapèl étan pti nou la konète in l’épidémi la polio. Dann tan-la moin lété dan lékol primèr é nout kaz lété lékol-lékol Boi d’nèf Sin-Dni.

Kansa sa l’arivé ? Mi rapèl pi bien mé mi koné sa l’arivé pars in zour moin la parti in konsèr Sin-Lé dann in sal la méri. Dann tan-la, lo mèr té Mario Hoarau é nout famiy téi sava pran vakans bordmèr kartyé troi lète - Sin-lé si zot i vé. Donk, dann konsèr-la moin la antann in moun, in shantèr komik, apré shant lo shanté « Polomyélite.. maladi d’la po é d’la trip ». Donk si moin la antann sa, sa i vé dir isi shé nou, momandoné maladi-la la sévi.

In n’ot afèr mi rapèl, dann tan-la dann zoinal Paris Match, in madam sépa l’afrik di Sid, sépa l’Australie l’avé géri in bonpé d’moun l’avé trap la polio avèk bann bin lo sho ! é konm mon famiy lété ranségné kan ma sèr la gingn lo maladi-dann tan maladi la la pass shé nou - la sèrv lo bann bin lo sho pou anpèsh son bann manb tourn dsi zot mèm konm sa téi ariv kékfoi avèk maladi-la.

Inn-dé zafèr mi rapèl bien sé ké nout papa la anpèsh anou manj gouyav mir pou pa trap la maladi.L’anpèsh anou galman boir d’ lo robiné é mi oi ankor zordi, dann mon tète, in préparasyon té pa gayar pou vréman : dolo roz avèk pèrmanganate potasium é in drol de gou mi pé dir azot.

Sèl késtyon mi poz amoin si nou lété konfiné sansa nou lété pa. Mi rapèl nou lété troi-kat zanfan défandi alé zoué déor, manz bann frui. Donk nou lété konfiné dann in sal de klass. Kisa la désid sa ? Préfé sansa sé nout famiy la désid sa. Konm èl la désid bril bouké fèye kanf kan téi ariv lo soir sépa kont la polio, sépa kont la fyèv palidéène ou d’ot tablatir ankor.

Bon nouvèl pou fini : ma sèr la gingn son gérizon, mon pti frèr la gingn la syène galman mé pétète li té pa malad. An pliské sa, kan nou la sort nout konfinaz nou la bien manj gouyav épi d’ot frui é sa té bon… Mi pans kan m’a sort lo konfinaz koméla, mi sava profite in bon bol de l’èr, réspiré avèk gourmandiz. Mé pou sa, alon atann ankor in pé.