Dann zistoir moin la rakont azot, in Roi l’avé pèrd son dé prinsèss. Zot té pa mor pars l’avé trouv dé moityé d’lamba dsi inn plaz, inn blé épi lot roz. Solon lo Roi sa lété la prèv son dé pti fiy té ankor an vi é zot l’avé lèss zot domi-lamba pou ké zot papa i arète pa rode azot partou dann kanal Mozambik-pars sé la listoir la éspassé… Konm moin la di azot lo roi l’avé rod in pé parou san trouvé ziska ké li rankont lo gran marin Béan driaké é la fé promète ali rode lo dé zanfan kont in fortine an pyès lor é larzan..sé sak lo marin la fé ziska k’in zour li fini par trouv azot dsi in plaz dann in zil i apartien in l’ogr. Zot i koné la suite : Béandriaké la propoz logr in zé é lo zé la déboush dsi la mor lo bébèté. Apré li la parti rode lo roi… mé ala sak i ariv : lo roi tro kontan i gingn in gran féblèss é li lé konm mor.
L’avé inn foi pou innn bone foi mésyé lo foi la manz son foi èk in grinnsèl..

Kan Béandriaké i oi lo roi mor, li désid ramenn lo bato roiyal ziska son kapital. Kan demoun i antan lo Roi l’arivé zot vien an gran kantité. Mé oila lo moun i plèr kan zot i rann azot kont lo roi lé mor épi i ri é i shant kan zot i apèrsoi lo dé prinsèss lé ankor vivan. Aprésa bann mizisien i mèt a zoué. Normal si lo roi lé mor i fo fé la fète mèm kontrékèr pars pou bonpé d’moun Madégaskar la mor sé la fnisyon pou bann malèr, épi lo rotour lo dé prinsèss sa sé in n’afèr k’i fète sa.
Mé oila, lo roi té pa mor li l’avé sinploman pèrd konésans é afors fé la mizik épi fé dézord li ropran konésans é son dé fiy i tonm dann son bra é zot i profite pou fé kalin inn-a-l’ot é tout la foul i fé parèye. La fète i dir mé momandoné lo roi i domann ousa i lé Béandriaké ? Son bato lé pi la, li fish laba dsi lorizon. Béandriaké i ropran son vi dsi loséan.
Lo roi i rode son bienfétèr pars li la promète in kantité l’or é l’arzan pou sak i rotrouv son dé fiy. Mé Lo gran marin i di dann son kèr : « L’or é larzan moin la pa bézoin pars sa i amenn pa lo bonèr ». Lo roi i rogrète mé li koné bien si Béandriaké la parti sé ké li l’avé in bon rézon pou li alé konmsa. D’apré sak i di Béan driaké la navig lontan dsi la mèr é apré li sé son zanfan étout son désan dans la navig konmsa. Bann prinsès la maryé é lo roi la viv vyé ziskatan loa fin di tan i fèrm son zyé.

Ala zistoir Madégaskar moin la rakont azot an sis lépizode par la bone volonté mon kamarad Honoré la kominik amoin zistoir-la é mi romèrsyé ali par raport tout bann léktèr zoinal Témoignaz. Par raport galman tout bann zanfan épi pti zanfan bann grann pèrsone va lir sa pou zot. Mi rapèl azot an passan sa zistoir nout bann zansète pars an parm banna néna in kantité malgash la viv épi la grandi isi dann nout péi.
La finisyon ? Sé pou dir azot konmsa, si zistoir-la lé vré, li lé vré, si li lé mantèr la pa moin l’otèr. Mi vanna li kon m moin l’ashté. Plime i koul, pti galé i flote.

Zistoir la fini.