Konm moin la di azot dèrnyé foi, (morso niméro 1)- Rialy lé pa kontan lo shoi son bann paran i fé pou li é shak foi li rofiz. Boudikont li di son paran : « Vi k’zot i fé pa lo bon shoi pou moin, m’alé rode in fanm par moin-mèm ! ». Aprésa Rialy i kol son shomin épi li sava : li marsh lontan, lontan mèm, li arète dann in vilaz épi dann in n’ot. Li sava oir tout bann fète épi li gard tout bann jennfiy : na poin pèrsone i plé ali … In zour, li la fine fatigé, li l’avé fine pèrd l’éspoir, astèr-la li asiz koté in basinn-lo. Ala li oi in jenn fiy i ariv avèk in vaz an tèr dsi son tèt pou li pran d’lo dann basin. Kisa i lé sa ? Kosa èl i fé la ?

L’avé inn foi, pou in bone foi, mésyé lo foi la manz son foi èk in grinn sèl.
Lo jenn fiy i ariv koté la sours épi èl i fé konmsi èl i oi pa Rialy mé èl i rogard a travèr son bann gran sil lo zyé. El i trap dolo avèk son krush é èl i prépar aèl pou alé.
Rialy i vien koté èl épi li di : « Jenn fiy, ousa ou i sava ? Aspèr in n’éstan. Solèye lé ankor sho é shomin lé dir pou monté.M’a ède aou port mon krush dolo.
- Lo jenn fiy i réponn ali : « Ou lé zantiy, mé si ou i arète amoin la pa solman pou moin gingn in pti ropo »
- Di amoin, jenn fiy, koman ou i apèl ? ?
- Mi apèl Ratanakanjolova, moin néna kinzan é moin la vni rode dolo pou mon papa.
- Rialy i ropran : « In jenn fiy i doizète kontan alé rod dolo pou son papa, mé èl sré pa pli kontan si èl téi sava rode dolo pou son mari ? Ou noré trouv lo shomin pli kourt épi lo krush pli lézé pou porté. »

Kriké ! Kraké ! Kriké M ésyé ! Kraké Madam !
- La fiy i di : « Sirman mi èmré myé alé shèrch dolo pou mon mari boir. Di amoin : Ou i koné in moun mi pouré kontant ali ? Mi yèmré avoir in mari la pa pèr arien ».
- Rialy i di : « Mi koné inn konmsa. Li apèl Rialy é li la marsh dé zour é dé zour pou vni isi pou pansh ali dann kré la sours pou ranvoye mon limaz épi la tiène ».
Zot dé i vien inn koté l’ot dsi lo bor basin é zot i oi an mèm tan son l’imaz é sète la jenn fiy. Astèr-la, toudinkou, in flèr blan i tonm dann lo. Lo dé moun amouré i kroi sé lo sor la réini azot inn sanm l’ot. .. Rialy i ramass lo zoli flèr blan épi i donn sa Ratanakanjolova. Apré sa zot dé ansanm i romont lo shomin é Rialy i oi dsi la otèrin gran mézon avèk in toi pointi. Zot i marsh toulédé san parlé mé apré in néstan lo jenn fiy i arète épi èl i di.
Kèl késtyon lo jenn fiy néna pou poz ankor Rialy. Si té moin Rialy nora komans trap la pèr. Solman Rialy i di pa li la pa pèr arien !

A suiv : Zistoir madégaskar - Rialy i vé maryé-troizyèm morso pou samdi 14 mars l’ané 2020.