Mé zami, moin l’apré rakont azot in zistoir madégaskar : sète Riany i vé maryé mé li é pa kontan avèk tout madam son famiy I trouv pou li. Ziska k’ li désid alé rode par li mèm, in fanm pou li. Li trouv pa mé in zour li dsann dann in basin lo pou boir épi pou ropoz in pé. Toudinkou in mamzèl bèl konm lo zour i ariv é rant inn é l’ot lé konm in vré kou d’foudr é lo mamzèl i amen ali la kaz son papa. Mé oila, lo gramoun lé méshan é li lans lo jenn jan troi défi. Zordi sé listoir ldé rant troi défi ni sava suiv.

L’avé inn foi pou inn bone foi, mésyé lo foi, la manz son foi èk in grinnsèl.
Donk Rialy épi lo mamzèl i rant dann la kaz lo Roi Randriakirou lo papa la zoli prinsèss Ratanakanjolova. Lo roi i di avèk Rialy :
« Astèr ou la rantré ! Ou i koné kosa i atann aou ?
- Mi koné Rialy i réponn é mi aksèp sak i atann amoin »

Koté la kaz Rialy bann fèye pyé banane i komans vni jone é momon lo ga i komans ète trakasé pars sanm pou èl son garson lé dann danzé. Rapèl azot Rialy l’avé plant in pyé banane déyèr son kizine étan pti é lo fèye banane i rèss bien vèr kan tout i roul ron, mé si néna in danzé lo bann fèye i joni. Pou kosa zot i joni zour-la ?
Pars lo roi Randriakirou la lans promyé défi ; in ash i sava dirèk diréksyon la tète Rialy, mé lo jenn jan soupl konm i shate i évite lo lansé d’la ash ki sava anfons anlèr déyèr son tète. Koté la kaz Rialy lo fèye banane i arvien vèr vèye pa koman.l’èr-la lo momon i koné son garson la évite in promyé danzé. Mé la pankor fini : moin la di azot néna troi défi.

Lo roi i trap in gran marmite. Li mélanz dé troi pogné pady avèk in bon kantité lo sab. Apré li di avèk lo jenn jan :
« Astèr i fo ou i sépar lo sab avèk lo pady an pé d’tan é si ou i ariv pa la mor i atann aou ! »
Rialy i trap lo marmite épi li sort déor. Kan li ariv déor i sif bann zoizo épi li di : « Sépar lo sab avèk lo pady é mète tout lo pady dann la marmité é tout lo sab an déor. Rialy lé zami avèk tout bann zoizo é bann zoizo i ékout ali bien, i obéi ali bien. Lo roi i bate son dé min ansanm mé lo travaye lé fé Alor lo roi i di : « Kroi pa ou la fine gingn la parti, pars lo pli térib rant tout lo troi défi i atann aou ». Rialy i di, li la pa pèr arien, li la pa pèr lo troizyèm défi.

Kosa i lé défi-la ? Kosa i ariv ankor ? Lo bann fèye banane i joni in pé plis é lo momon lé trakasé mé an vitèss lo bann fèye i vien vèr. Lo momon lé konsolé pars èl i konpran son zanfan la évite ankor in nouvo danzé.mé lo troizyèm danzé lé la, é a s’ki paré lé pa rodinèr. A suiv troizyèm défi dann zoinal samdi.

A suiv, Zistoir Madégaskar - Rialy i vé maryé-sinkyèm morso pou samdi k’i vien.