Moin la fine komans rakont azot koman Rialy la désid alé rode par li mèm in moun pou li maryé pars solon li son paran té pa kapab rode pou li in madam k’i konvien ali Li sava. Mé son momon i domann ali koman èl va fé pou avoir son nouvèl. Rialy i réponn i sifi rogard pyé banane li la planté étan pti. Si lo bann fèye lé bien zoli, bien vèr, sa i vé dir li lé bien, si lo touf banane i komans joni sansa séshé sa i vé dir li lé pa bien ditou.

L’avé inn foi, pou inn bone foi, mésyé lo foi la manz son foi èk in grinnsèl.
Rialy i komans alé vilaz an vilaz, fète an fète, avèk lspoir trouv in madam pou li maryé. Mé arien a fèr, li trouv pa. Li trouvpa in madam a son goué sa i komans par fatig ali. Mé i zour, li lé fatigé, li lé dékourajé é li ariv koté in basinn lo. Li sava boir é sé pa koman sa l’arivé, in zoli jenn fiy èl osi i vien rode delo. El i fé sanblan mèm pa oir rialy, mé li, pou son par, son kèr i bate dann dson do-mamzèl-la i ral ali pou vréman. Mé oila, èl i pran d’lo avèk son krush é i diré k’èl i sava partir. Rialy i vé paèl i par sé pou sa li komans koz avèk èl.

Li domann : « jenn fiy ! Ousa ou i sava.? Arète in néstan : solèy lé sho é shomin lé a pik.M’a ède aou port out krush. »
- Lo jenn fiy i di : « Ou lé jantiy, mé si ou i adrèss amoin, la pa solman pou ède amoin port mon krush. Koman ou i apèl ou ? Moin mi apèlRatanakanjolova : moin néna kinzan é moin ala vni rde delo pou mon papa. »
- Rialy i ardi a èl : lé bien jantiy alé rode delo pou son papa, mé i diré pa ou arien rode delo pou out mari ? Shomin sré pli kourt, moin difisil pou travèrsé épi out krush nora été pli lézé pou porté.
- Mi pans ou i di la vérité, moins ré bien kontan alé rode delo pou mon mari boir. Mé di amoin si ou i konétré kèlk’in mi pléré ali ? Mi rode in mari néna kouraj é k’noré pa pèr arien.
- Oui Rialy i di : Mi koné inn é li apèl Rialy é li la marsh in kantité jour arienk pou trouv aou isi pou nout dé ziamz i féfléshi ansanm dann basin. Sé sak i ariv é an mèm tan in flèr blansh i tonm dann lo. Lé dé jenn jan i kol shomin épi i romont la kote ziska in gran mézon avèk in toi pointi. Dèrnyé bout shomin, La fiy i di avèk Rialy :
« Ou i pé ankor prann out shomin pou alé pars isi mèm mon papa i arète. Li mèm lo roi Randriakirou. Li lé for, li lé rish mé li lé méshan pou vréman. Si ou i rant isi dann palé-la sa i vé dir ou i aksèp lo bonèr sansa la.
- Rialy i réponn li vé lo bonèr sansa la mor.
- Ratanakanjolova, ashèv parlé : èl i di son papa la vi lo jenn jan boir d’lo dan la sours é la domann amoin pou ramenn aou isi dann son palé.. Mon papa i vé maryé amoin avèk in moun for, plinn kouraj, Sa i fé arien si la pèrsone lé rish sansa lé pov pars li mèmm li lé bonpé rish..épi èl i fé oir Rialy lo bann troupo épi lo bann karo dori dann la plène.

Ziska la lign lorizon. Mé antansyon ou, oré troi zéprèv pou pasé, inn pli dir ké l’ot… Rialy lé dakor pou lo bann zéprèv.

A suiv in kont Madégaskar— Rialy i vé maryé-katriyèm morso. Pou mèrkrodi somenn proshène.