• Matante Zélida la ékrir Justin :

- Mon shèr nové, mon spès salté,
Zot, bann rouj-de-fon, zot i èm dir ninport de koi zot ! Zot l’apré dir nana shomaz an parmi bann jènn, san oir partaz lo vré avèk le fo.
Byinsir nana shomaz, si i rode pa travay. Byinsir, lo shif shomaz lé kosto, sirtou si in bonpé i travay o-noir. Alors, tir malol dann z’ot zyé, agard la vérité an fas. Assé arpète tout z’ot balivèrn don ! Z’ot zistoir pou fé dor d’moun doboute !

• Justin la fé aèl pou répons :

- Mon vyé matant, touzour-dan-lérèr,
Moin na linpréssyon sé vou k’i voi pa klèr. Sé dann out zyé ké nana malol… !
Alors, d’apré ou, kan in gran kantité bann jenn i fé ékri z’ot nom pou trouv in travay, sa i vé dir zot i vé pa travay ? Kan in bonpé d’moun i rode travay zour-pou-zour, sa i vé dir zot i travay o-noir ? Donkalor, demoun la pèrd la boul si zot i pass z’ot tan fé dé shoz initil pou zot.
La pa la vérité k’ou i di, sé in bann zistoir pou fé dor d’moun doboute !

Justin