Donk dèrnyé foi moin la di azot dé kamarad in pé fourné la parti dan lé o pou rode gouyavyé. Konm lo propriyétèr l’avé barikade son karo d’tèr, zot la koup lo klotir avèk in tonaye é aprésa zot la ranpli zot panyé san difikilté épi zot la manz in vant épi zot la kol shomin Sin-Dni an désandan.

Kriké ! Kraké ! Kriké Mésyé ! Kraké Madam !
Astèr téi rèss arienk pou alé vann. Soman zot la désid partaz lo sharjman : inn la rékipèr in panyé téi trène dann la kour d’moun épi zot la désid partaz égal-égal. La nuite la fine arivé é zot i rode in l’androi pou fé lo partaz. Méyèr l’androi zot i trouv sé lo simtyèr Sin-Dni, la pa loin bazar, é mèm san alé bazar i pé alé kaz an kaz pou vann lo marshandiz a la mok. La mok sa i mank pa é lo tan non pli i mank pa.
Zot i ariv simértyèr é zis dovan la rantré dé bèl frui i tonm atèr é pou l’instan zot i pran mèm pa la pène ramassé. An vitèss zot i rant roiyome vant an lèr. Donk ala zot dann simtyèr é zot i partaz : dé pou moin, dé pou toué, dé pou moin, dé pou toué. Tizonm i pass dann shomin koté simetyèr é li antann lé dé partajèr : dé pou moin, dé pou toué ! Tizonm bouré an montan, li kroiz son zami Polin. Li kal in kou épi li di : « Polin mon fra, mi sort antann dann simetyèr Bondyé avèk lo dyab apré partaz lé zam ». Polin i pans son dalon la fine pèrd la tète mé li dsann kant mèm ansanm pou li antann par li mèm. Zot i ariv gran baro kartyé troi baro é zot i ékout mèm. Lo partaz la pankor fini :
Dé pou moin ! Dé pou toué ! Dé pou moin ! Dé pou toué !
Transpirasyon froide i koul dsi zot. Zot i ékout ankor in kou é zot i antann :
« Dé dèrnyé pou moin !
- A non inn i di, ni partaz égal-égal. Sé inn pou moin é inn pou ou !
- l’ot i réponn : inkyète pa néna dé la tonm dovan baro simetyèr ou va pran pou ou an sortan. »
Tizonm i rogard polin épi li di : « Dé dvan bar osé nou ! ». Lé dé sé pran zot zanm a zot kolé épi la bour an montan. Zot l’avé si tèlman pèr zot dé la kashyète tou lé dé dsou lo li. Momon Tizonm i vien rann aèl kont kosa l’arivé. El i di : « kosa l’ariv azot la ? »-Tizonm i réponn : « In pé plis nou téi sort pa vivan pars Bondyé avèk lo dyab la mank souk anou koté simétyèr Sin-Dni. Domann Polin si vi kroi pa moin ! ». Polin i aprouv. Lo momon i di : « Zot lé fou marmaye kan lé péré konmsa i marsh pa la nuite ! ». Tizonm i ardi son momon : « Péré, péré, ou i di sa ou momon mé si ou l’avé antann, ou noré pa di sa konmsa ! »

Mon zistoir lé fini. Si li lé vré lé vré. Si lé mantèr la pa moin l’otèr. Antouléka la pa moin la manti. Mi vann solman konm moin l’ashté-La fini