Demoun téi vé pa kroir ali, mé zot la bien vi li lété for, kan san fé dézord li la sorte son plass dsi lo ban pou alé, avèk in pa téi rézone dsi la dal an diréksyon lo gro ta d’boi.

Kan li l’ariv landroi lo boi té antassé,li la pran in rondin bien long épi bien ron, pa sète té lo pli lézé, mé sète lété lo pli lour li té i gingn trouvé,.El l’avé in bann neu, la mousse, épi konm k’i diré zèrgo konm sète in vyé kok.

Pou komanssé li l’amontr lo boi toute demoun épi li la di–rogard sa ! Sa lé pli dir k’in bare d’fèr, é poitan mwin ki koz èk zot mi sava kass sa an dé morso dsi mon kuisse konm si lété in sinp zalimète.

Kan li la di sa,bann zonm épi bann fanm, la mète doboute konm si zot lété dann in légliz.L’avé d’moun la vi sa, l’avé Barget lo nouvo maryé, Perraud k’i antan prèss pa zorèye,Ramier in boug la zamé rakonte mantèr. Papou ossi lété la é mi rapèl tré bien. Castèl ossi i pé rakont azot sa, toute in bann demoun i rakont zot tour d’fors dann bann véyé é lété kapab étone demoun l’inn apré l’ot, kaziman fé tonm azot a la ranvèrse...

Soir-la banna té i ri pi, mi assur azot. Zot téi admir déza l’onm for. Zot téi admir ali san kozé épi san bouzé. Dmoun téi antannn marmaye koushé apré ronfl déyèr zot.

Kan li la santi dmoun lété sou son l’anpriz, kan li a santi l téi domine azot, li la mète ali bien daplonb dsi son zanm é li la lèv lo rondin do boi san préssé dousman-dousman par dsi son tète.

Momandoné li la tienbo lo rondin an sispandiyé o bout son bra bien droite-lo zyé d’moun téi klate, la boush téi torte avèk doulèr- aprésa li l’abate lo rondin.Han !In kou, in sèl, li la kass son zanm.

Lo zonm for - in zistoir Jules Renart ékri dann franssé, mwin la mète an kréol rényoné