Samdi passé moin la rakont azot Binan épi Kanaye i sava dann mèm lékol boi d’nèf Sin-Dni é la famille Poisson rouz la désid mète Kanaye lékol Lebon laba dann kartyé Sint-Klotid. Mé, konm moin la di azot, si lékol Lebon la aksèpt ali, vis-réktora la désid sa téi fé pa : marmaye Boi d’Nèf i sava lékol Boi d’Nèf é marmaye Sint-Klotid sava lékol Sint-Klotid. Si tèlman ké in gran matin kanaye la prézant lékol Boi-d’Nèf avèk in mo lékol Lebon, in sèrtifika radyasion d’apré sak mi kroi.

Lo dé marmaye téi frékant dann tan-la la klass fin d’étid dézyèm ané. Sa té pou pass gran sèrtifika moi d’ zilyète. É fransh vérité la diréktris té i fé travaye azot pou vréman : o lèrk sort katrès zot té i sort sinkèr passé, é zédi matin z téi fé azot lékol. Mèm kan téi ariv pa tro loin légzamin dimansh apré la mèss l’avé ankor in séans révizyon. An travayan konmsa té prèské sir lo dé marmaye téi sava dékrosh zot gran sèrtifika d’étid.

A ! Moin la obliye dir azot, bann maramye téi prépar sèrtifika té dsi in ban é dovan in tab, mé l’avé pa mète lé dé garson inn koté l’ot konmsa lo dé famiy l’avé poin in rézon pou tir inn, sansa l’ot, sansa lé dé dsi lo bann lékol. Narté pa in bon solisyon pou pèrsone ép kék moi d’lékol sa téi doi pass vite sa... Dann dé troi somenn nora fé légzamin blan : sink an tou é sak té i gingn troi l’avé lo droi pass sèrtifika d’étid… Parti konm lété parti, té sir lo dé marmaye nora gingn zot droi pou pass zot légzamin é préparé konm té préparé lé sir zot téi sava gingn zot diplôme.