Samdi moin la komans rakont azot zistoir Ronar lo goupil épi Izangrin lo lou. Lo tit sé la pèsh mirakilèz. Dann mon zistoir Ronar, vant vide, i ariv dsi lo bor la rivyèr épi li oi d’moun apré pèsh poisson : in bon pèsh d’apré sak i paré mèm si pou péshé banna la kass la glass pou fé pass zot lign. Ronar i sèye shapard inn-dé poisson, mé in pé plis banna i tyé ali. Li sov épi li kalkil koman li pé fé pou volé san danzé. Li louk bann péshèr é kan li oi banna lé bon pou démaré li aprète ali pou pass a l’aksyon.

Kriké ! Kraké ! Kriké Mésyé ! Kraké Madam !
Kan li oi lo sharète i sort dann shomin séré pou anbèk dann shomin pli larz li sava vitman épi li alonz dann miliyé shomin. Li fé lo mor. Sharète i ariv ! Lo boug i amenn shoval i an apèrsoi ali an distans. Li arète son vézikil épi i di avèk son kamarad : “Oté ! agard, in goupil tyé dann shomin ! Alon trap sa pou fé in fourir ansanm. Nou va vide l’intèryèr, nou va prépar ali, épi vann asa in bonpri.”
L’ot i di « dakor vyé frèr ! arète sharète-la, mi sava kapaye ali. ». Pa sito di, pa si to fé, lo kamarad i sote atèr, i fons dsi lo goupil i trap sa par la ké épi i balans lo zanimo dann sharète... Zis koté landroi néna panyé poisson. Ronar i san la bone odèr mé li bouz pa. I atann banna i obliye son prézans. Dé troi san mète i sifi. Li lèv dousman, li trap in paké poisson anfilé avèk in kord konm la kord shoka épi li sote dann fon épi li kal in pé pli loin dovan sharète é li fé bien sign banna li la trap zot poisson. Li yèm takiné ronar-la !
Inn rant lé dé boug i sote atèr épi li kour dsi goupil pou trapé. Tro tar mounoir ! Ronar i sov dan la foré, inposib trap ali é an atandan lo poisson lé pri é bien pri. Ronar i manz in pti, tou kri konmsa, késtyonn boush in pé son kré d’vant.. Aprésa li kol shomin pou li rant son kaz. La-ba son madam épi son dé pti goupil i atann ali. Li lé kontan, li lé fyèr. Zordi li va ranpli son vant pou d’bon épi son famiy galman.
Mé kisa li oi i ariv dann boi ? Kisa si la pa lo kite ta bouèt do Izangrin, lo lou. In vyé zènmi li manz pa in grinn sèl ansanm. Sèrvo Ronar i tourn an katriyèm vitèss. Li mazine tout suit pou tout suit in tik-tak pou gard son poisson, anpèsh son zènmi bourade ali, é si posib mète ankor in foi lo lou dann l’anbara. Samdi proshin nou va oir sa.

Zistoir pou rakont dsi galé : la pèsh mirakilèz.-Dézèm bout la fini, proshin foi lo troizyèm morso.