L’avé inn foi pou inn bone foi méssyé lo foi la manz son foi èk in grinn sèl.

Mamadou la gingn in bon akèye avèk la famiye son kamarade jéni é kan la di ali vien vizite azot tazantan li la pa mank rand azot vizite. Astèr zot i koné pétète pa, band jéni i viv mèm land roi ké d’moun mé lé konm k’i diré in mond partajé lé z’inn té i rankonte pa lé zot : jéni in koté, é demoun normal zot koté… Astèr i fo dir azot kan mamadou la vni oir la famiy lo jéni li la trouv la sèr son kamarde é mand zèl-la téi ral ali pou vréman si tèlman li l’avé toultan anvi oir aèl.. la jenn fiy la pran l’abitide èl ossi pou rand vizite la famiye Mamadou é sak i dové arivé l’arivé, lé déë la tonm amouré éMamadou la domand son famiy ot fiye an maryaz.

La famiy lo jéni la di avèk Mamadou épi zot fiye :

« Mé zanfan, mi mète azot an garde pars la rass jéni épi la rass demoun normal i shass pa ansanm. Zot i antan pa é mèm demoun normal i panss jéni i porte azot malèr. Ankor kontan lé z’inn é lé zote i oi pa inn a l’ote mé zot i koné inn é l’ote i égziss. ». Mé koman zot i koné vi ké zot i oi pa inn a l’ote ? Souvan défoi bann sorsyé i koné zistoir-la mé zot i rakonte pa d’moun pars l’avé in kantité zistoir bann zansien téi rakonte, dsi galé dann l’antouraz pyé d’boi lo soir é mèm i paré in kou la guèr noré pété rant lo dé popilasyon. Dopi la guèr lé z’inn konm lé zot l’avé déside pi oir inn a l’ot pou évite la guèr épi la vyolans.
Mamadou l’avé pa pèr bann jéni pars konm li la parti shé zot avèk son bag majik épi konm li la étidyé avèk in kamarade Jéni, i téi panss bann zistoir-la sa téi apartien lo passé é lo jenn marmaye téi oi pa pou kossa li noré partaz in lansien kérèl rante dé popilasyon i viv an parmi san frékante pou vréman lé z’inn é lé z’ot.

Kossa v’arivé, Mamadou i sava gngn maryé avèk la fiye jéni ? Nou va oir sa pli d’van.
La pankor fini.